KOMUNIKADO DI PRENSA
No. 2015/012

 


 

Selikor NV
Fecha: 30 di òktober 2015

Tópiko: Selikor lo duna komunidat bèk e servisio ku e tin derechi riba dje
Telefon: 434-1349/Faks: 465-6964
Mail: info@selikor.com

wèpsait: www.selikor.com


 

Selikor lo duna komunidat bèk e servisio ku e tin derechi riba dje

 

Ya pa algun siman kaba Selikor NV ta eksperensiando retrasonan den su skema di rekohé shushi di kas a konsekuensia di problemanan tékniko na algun ekipo. Konsekuensia di esaki ta ku e kompania no ta brindando e nivel di kalidat di servisio kustumbrá. Tim di maneho di Selikor ta hopi konsiente ku e situashon aki ta sòru pa basta iritashon serka habitantenan kendenan ta trese nan malkontentu den diferente forma i via diferente medio dilanti.

 

“Tur nos atenshon ta dirigí na tuma e medidanan nesesario pa aliviá e situashon aki mas pronto posibel i di forma struktural”, asina John Cijntje manager enkargá ku e departamentunan Operashonal di Selikor a trese dilanti. Cijntje ta bisa ku ya ta tumando diferente medida pa atendé ku e reto ku Selikor ta pasando aden. E ta menshoná diferente akshon na departamentu di Garashi di Selikor pa alsa e grado di disponibilidat di ekipo. “Nos ta bai traha oranan èkstra, tantu den siman komo den wikènt, pa drecha ekiponan dañá i tambe hasi mas mantenshon preventivo na nos ekiponan. Na momento ku un trùk daña riba ruta, nos lo bai purba mas tantu posibel pa hasi e reparashon na e sitio en kuestion mes.” Efektonan positivo di tur e medidanan aki komunidat lo bai sinti nan den e próksimo simannan.

 

Pa loke ta trata kompra di ekipo nobo manager Finansiero Angelique Fredema-Wallé ta bisa: “Nos a kumpra 4 trùk nobo pa aña 2015 pero, debí na un retraso den entrega, esakinan lo yega na yanüari 2016. Ta trata aki di un invershon di alrededor di 1,7 mion florin.” Fredema ta splika mas aleu ku ta e intenshon pa den e presupuesto di aña 2016 inkluí un invershon pa kompra di 4 trùk mas di manera ku por yega na un total di 8 trùk nobo den 2016. “Ta trata aki di ekiponan kostoso i nos a hasi diferente estudio pa kumpra e ekiponan ku ta apto pa e tipo di kareteranan ku nos tin i tambe nos klima”, segun Fredema.

 

Personal di Selikor ta hasiendo su esfuerso máksimo pa kumpli ku tur bario mas tantu posibel i tambe ta purba di trata tur keho ku e atenshon i dedikashon nesesario. Angelique Sanches-Rene manager enkargá ku Rekurso Humano tin palabranan di elogio so pa e personal. “E situashon aki ta rekerí hopi pasenshi i serenidat di nos hendenan. No solamente pa e frustrashon ku nan tin di no por kumpli ku nos klientenan manera mester ta, sino tambe pasombra tin bes nan ta wòrdu ataká verbal i físikamente dor di klientenan malkontentu.”

 

Selikor lo sigui midi i registrá su propio prestashon riba un base diario. Manager enkargá ku e departamentu ku ta kolektá sifra Glyraine Jukema-Celestina ta rekonosé ku den e simannan tras di lomba e prestashon di Selikor no a kana segun normanan di kalidat ku e kompania mes ta pone pa su mes. “Nos ta pone normanan haltu pa nos mes i apesar ku e dianan aki nos no ta logra nan, esaki no ta motibu pa nos kambia nos normanan. Nos ke mantené nan haltu pasombra nos ta konsiente ku nos klientenan dia pa dia ta bira mas eksihente.”

 

Finalmente manager enkargá ku departamentunan Komersial, Relashon Públiko i Servisio na Kliente Yahaira Hofdam-Davelaar ta trese dilanti ku Selikor semper tabata i lo keda un kompania transparente. “Nos tei pa sirbi i apesar ku na e momentunan aki nos tin bastante reto nos dilanti nos ke duna kara i sigui karga nos responsabilidat.” E ta sigui bisa ku kada trahadó di Selikor por hinka su mes perfektamente den sapatu di e kliente. “Nos komo trahadó tambe sa kiko i kon e ta sinti ora dia bòltu i nos kònteiner ta pará pafó ainda yen pasó nos mes trùk no a pasa. Ta netamente esaki ta hasi ku tur dia di nobo nos ke traha ku dedikashon i di kurason pa kumpli ku e pagadó di impuesto, ku ta nos klientenan.” Hofdam ta enkurashá komunidat pa sigui ta krítiko riba Selikor, pero semper ku rèspèt. “Esaki sigur lo tene nos skèrpi.”

 

Nos komo personal kompletu di Selikor ta pidi komunidat karga djis un tiki mas ku nos. Nos ta rekonosé i ta atendiendo ku e problemátika aki di forma desidido. Ku forsa di konvikshon i trabou inkansabel nos lo duna komunidat bèk e servisio ku e meresé i tin derechi riba dje.