KOMUNIKADO DI PRENSA
No. 2010/005
Selikor NV
Fecha: 30 di yüli 2010
Tópiko: KAYA DI MEDIO AMBIENTE A YEGA E PUNTO DI MAS HALTU
Telefon: 434-1349/Faks: 465-6964
web-site: www.selikor.com
KONSTRUKSHON DI E KAYA DI MEDIO AMBIENTE A YEGA SU PUNTO DI MAS HALTU
Djabièrnè, 30 yüli 2010, Selikor NV den presensia di medionan di komunikashon i un grupo di invitado a selebrá e hecho ku e konstrukshon di e Kaya di Medio Ambiente a yega e punto di mas haltu.
Na inisio di e trabounan di konstrukshon Selikor a enfatisá riba e hecho ku awendia maneho di shushi ta eksigí atenshon riba e aspekto di resiklahe. Motibu sufisiente pa Selikor a skohe stratégikamente pa konstruí e kaya di medioambiente. Esaki ta duna kontenido na e maneho di resiklahe ku Selikor a bin ta hiba.
Den e kaya di medioambiente aki públiko por pasa estilo “drive through” ku nan pekùp òf trùk pa depositá e diferente kategoria di shushi di forma separá den kònteinernan ku ta destiná pa esaki.
Selikor ke motivá i enkurashá un i tur pa for di awor kuminsá separá nan shushi mas tantu posibel, sigur shushinan manera empakenan di bebida di glas, aluminio i plèstik ya ku pronto lo bai lansa diferente kampaña pa públiko bin trese e tipo di shushinan aki na e kaya di medioambiente na Malpais.
