KOMUNIKADO DI PRENSA
No. 2011/001


Selikor NV
Fecha:
12 di yanüari 2011
Tópiko:
Plan di maneho nobo
Telefon: 434-1349/Faks: 465-6964
wèpsait:  www.selikor.com


Selikor ta trahando pa yega na un plan di maneho nobo

Ku aporte di diferente stakeholder den nos komunidat

Dia 20 di desèmber 2010, Selikor a kumpli 15 aña komo un kompania anónimo di gobièrnu. Den e 15 añanan ku tin tras di lomba Selikor a bin ta hiba un maneho integral pa loke ta trata maneho di shushi. E maneho integral aki ta konsistí di 7 stap ku ta kubri delaster un aspekto ku tin di haber ku shushi. E 7 stapnan kual ta, prevenshon, rekohé, transportá, resiklá/reusá, trata, prosesá i kuido despues ta forma un kadena den su totalidat.

Pa hiba e maneho integral aki, Selikor no por hasié su so. Diariamente Selikor tin di haber ku e personal, klientenan i tambe  representantenan di diferente sektor den nos komunidat. E grupo aki tin influensha direkto pa loke ta trata e maneho ku Selikor a bin ta hiba.

 Pa e motibu aki Selikor, den proseso pa yega na un plan di maneho nobo, ku ta kubri un periodo di 5 aña, a inkluí diferente stakeholder den e trayekto. Selikor a organisá algun seshon di grupo di enfoke ku representantenan di diferente sektor den nos komunidat. Aki ta trata di tantu sektor privá komo sektor públiko. Durante e siman aki lo bai tin algun tayer di trabou. Meta di e seshonnan aki ta pa, konhuntamente, definí e direkshon ku e Selikor lo mester kana den e próksimo añanan i yega na un plan di maneho pa e kompania. Teniendo kuenta ku e interes i deseo di tur grupo (stakeholder) den nos komunidat.

 E representantenan ku lo forma parti di e sektornan lo ta e.o. Vomil, GGD, Milieudienst, SKS, Polis, LVV, DOW, DMO, Fesebako, SKO, Secretariaat Stadsvernieuwing, DWI, FKLB, CTB, Chata, Suvecu, Douane, Aqualectra, Organisashon di importashon, Fundashon Empresa Chikí, departamentu di Finansas, AJZ, DROV, DEZ, KvK i VBC.

Selikor ta konvensí ku trahando huntu so nos por garantisá un medioambiente sano i un pais Kòrsou mas limpi i bunita.