KOMUNIKADO DI PRENSA
No. 2012/012


Selikor NV
Fecha: 13
di yüli 2012
Tópiko: Selikor ta remplasá kònteiner pa depositá glas na diferente pòmp di gasolin
Telefon: 434-1349/Faks: 465-6964
wèpsait: www.selikor.com


Selikor ta remplasá kònteiner pa depositá glas na diferente pòmp di gasolin

Na aña 2002, Selikor a inisiá ku un proyekto kaminda ta duna tur habitante di Kòrsou oportunidat pa depositá nan glasnan bashí den kònteinernan di glas situá na diferente parti di Kòrsou inkluyendo pòmpnan di gasolin.

Mayoria di pòmpnan di gasolin a brinda Selikor e posibilidat pa pone un kònteiner di glas riba nan tereno i di e forma aki nan tambe a yuda konsientisá nos komunidat i kontribuí na un medioambiente sano.

Selikor den su afan pa sigui mehorá nos servisio entretantu a remplasá e kònteinernan aktual pa kònteinernan di 1000 liter di plèstik ku un buraku riba e tapa pa fasilitá e forma pa depositá e bòternan den e kònteiner.

E sitionan ku aktualmente tin e kònteinernan di glas ta na e pòmpnan di gasolin na: Juan Domingo, Hanenberg, Tera Kòrá, Buena Vista, Palu Blanku, Brievengat, Mari Pampoen, Gasora i Colon.

Ta e intenshon pa amplia e lokalidatnan aki kaminda stratégikamente públiko lo por depositá bòter di glas den e kònteinernan aki ku e fin pa resiklahe. Selikor ta hasi un apelashon riba komunidat pa hasi bon uso di e kònteinernan aki i depositá solamente bòter di glas den e kònteiner di glas. Importante ta pa nos kuida e kònteinernan i yuda kontribuí na un Kòrsou limpi i bunita.