KOMUNIKADO DI PRENSA
No. 2013/009
Selikor NV
Fecha: 20 dezèmber 2013
Tópiko: Selikor ta selebrá dia di trahadó den sektor di limpiesa ku lansamentu di un kalènder deportivo
Telefon: 434-1349/Faks: 465-6964
wèpsait: www.selikor.com
Selikor ta selebrá dia di trahadó den sektor di limpiesa ku lansamentu di un kalènder deportivo
Djabièrnè 20 di dezèmber, riba dia di trahadónan den e sektor di limpiesa, Selikor NV a tene un konferensha di prensa pa duna atenshon na tur trahadó ku ta laborá den e sektor menshoná. Direktor General di Selikor sr. Wesley Kook kompañá pa presidente komisario di Selikor, sra. Carol Capriles i Minister di Bernard “Ben” Whiteman a hasi entrega di un plaka di mérito na trahadónan den e sektor aki. E trahadónan ku a risibí un plaka di mérito ta bini di diferente empresanan lokal ku ta Banco di Caribe, Trupial Inn, Lions Dive, Coca-Cola i Hucor Holding.
Durante di e enkuentro aki tambe presidente komisario di Selikor, sra. Carol Capriles, a hasi entrega ofisial di e relato anual 2012 di e kompania na Minister Whiteman. E relato anual ta konsistí di un relato finansiero ku ya a keda presentá i aprobá den luna di ougùstùs 2013 pa e hunta di komisario di Selikor.
Durante e konferensha aki tambe Selikor a lansa su kalènder pa aña 2014 ku ta dediká na hóbennan deportista i ta hiba komo titulo “Nos futuro ta dependé di un Medioambiente sano”. E deportenan ku ta aparesé den e kalènder ta tènis, natashon, atletismo, siklismo (mountain bike), futbòl i beisbòl kual nan ta deportenan ku ta keda práktika den airu liber. E hóbennan ku ta figurá riba e kalènder a risibí durante di e enkuentro un medaya di rekonosementu pa nan disiplina i prestashon den nan área di deporte. Ku lansamentu di e kalènder aki Selikor ta duna inisio na e atenshon ku e kompania lo bai duna na e rango di deporte den 2014 kaminda lo bai traha huntu ku organisashonnan deportivo i duna un aporte real na e loke Selikor ta konsiderá komo nos futuro.
