KOMUNIKADO DI PRENSA
No. 2014/007

Selikor NV
Fecha: 8 di ougùstùs 2014
Tópiko: Selikor huntu ku Ministerio di SOAW ta duna trabou na 16 buskadó di trabou
Telefon: 434-1349/Faks: 465-6964
wèpsait: www.selikor.com

Selikor huntu ku Ministerio di SOAW ta duna trabou na 16 buskadó di trabou

Djabièrnè 8 ougùstùs 2014, den kantina di Selikor NV, 16 trahadó nobo a risibí nan sertifikado despues di a pasa un training intensivo di preparashon pa trabou. Direktor general di Selikor sr. Wesley kook kompañá pa Minister Bernard “Ben” Whiteman i sra. Donate Philbert a hasi entrega di sertifikado na e 16 trahadónan ku a kulminá e trayekto di training.

Sr. Wesley Kook a splika ku den e plan di maneho Selikor tin komo un di su metanan prinsipal, duna kontenido na e responsabilidat síviko i sosial di e kompania pa ku komunidat. E proyekto aki ta fet perfektamente den e meta aki.

Sr. Ben Whiteman, den su kalidat komo Minister di Salubridat Públiko, Medio Ambiente i Naturalesa i tambe Minister di SOAW a mustra riba e importansha di e proyekto aki, komo ku e ta habri oportunidat di trabou i alabes e ta kontribuí na bienestar di komunidat.

E proyekto a inisiá den estrecho kolaborashon ku e Ministerio di SOAW. Pa SOAW e proyekto aki ta unu eksitante ya komo ku e koperashon ku Selikor pa pone 16 persona den trabou ta komplementá nan logro di duna mas tantu hende ku ta posibel, un trabou.

Meta di e proyekto ta pa duna oportunidat na buskadónan di trabou pa bini na remarke pa haña eksperiensha di trabou den un periodo kòrtiku i dirigí riba loke nan ta bai hasi. Den e kaso spesífiko aki, Selikor a prepará un grupo di 16 buskadó di trabou pa bin okupá un funshon den e kompania.

Na inisio di e proyekto trahadónan a risibí un training intensivo i asina sera konosí ku Selikor. E training ta konsistí tantu di un parti di teorétiko komo e parti di práktika. E diferente trainingnan tabata bou di enkargo di profeshonalnan ku ta laborá na Selikor mes.

E proyekto aki lo tin un durashon di 1 aña den kual e trahadónan aki lo laborá den e diferente departamentunan operashonal. Despues di un aña lo evaluá ku e trahadónan aki lo drenta den servisio di Selikor.

-riba e potrèt nos por mira e grupo di e 16 trahadónan ku a kaba di risibí nan sertifikado-