KOMUNIKADO DI PRENSA
No. 2014/012
Selikor NV
Fecha: 23 dezèmber 2014
Tópiko: Selikor ta pidi atenshon pa retraso den rekohementu di shushi di kas
Telefon: 434-1349/Faks: 465-6964
wèpsait: www.selikor.com
Selikor ta pidi atenshon pa retraso den rekohementu di shushi di kas
Selikor ta partisipá ku e kompania ta eksperensiando algun retraso den su skema di rekohé shushi di kas. Esaki debí na algun desperfekto ku a surgi ku nos ekiponan di trabou i tambe na e kantidat supstansial di shushi ku den luna di dezèmber aki komunidat ta ofresé.
Normalmente ta asina ku pa fin di aña semper e kantidat di shushi ku habitantenan ta deshasí di dje ta subi. Sinembargo e aña aki spesífikamente e kantidat a surpasá añanan anterior.
Selikor ta trata pa no laga ningun bario keda hopi dia ku nan shushi. E último aki sigur teniendo kuenta ku dianan di fiesta ku ta aserkando. E personal ta trahando den dos sheft pa asina garantisá ku e siman aki mes tur eventual retraso ta keda solushoná.
Klientenan ku tuma nota ku Selikor a pasa den nan bario pero no a bai ku nan shushi por tuma kontakto ku nos departamentu di Servisio na Kliente na 46-limpi, 465-4674.
Personal di Selikor ta hasiendo su máksimo esfuerso pa aliviá e situashon aki den un tèrmino di tempu kòrtiko. Selikor ta pidi su diskulpa pa eventual inkonbeniensia ku e retraso aki por trese kuné i ta pidi su klientenan indulgensia pa e situashon ku a surgi.
