KOMUNIKADO DI PRENSA
No. 2015/005


 Selikor NV
Fecha: 13 di yüli 2015

Tópiko: Selikor NV rumbo pa 20 aña sirbiendo komunidat
Telefon: 434-1349/Faks: 465-6964
wèpsait: www.selikor.com


Selikor NV rumbo pa 20 aña sirbiendo komunidat

Dia 20 di desèmber 2015, Selikor NV lo kumpli 20 aña komo un kompania anónimo di Gobièrnu. E fecha aki ta afirmá e logronan di e kompania i por mira bèk riba diferente desaroyo positivo pa loke ta trata maneho di limpiesa riba nos isla. Den e 20 añanan ku a transkurí e kompania a trese diferente kambio manera maneho di personal i  maneho di shushi kumpliendo ku normanan internashonal

Pa konmemorá e logronan aki durante e lunanan ku ta resta di aña 2015, sigur riba e dianan 20 di kada luna, Selikor lo tira lus riba e temporada di 20 desèmber 1995 te ku awor. Ta e intenshon pa yama danki na komunidat pa e oportunidat i e konfiansa ku a pone den nos kompania pa hiba un maneho di shushi responsabel. Pues den simannan ku ta bai sigui komunidat lo por mira i partisipá na diferente akshon i aktividat den kuadro di 20 aña Selikor.

Ku e logro di 20 aña di eksistensia aki Selikor lo sigui hasi uzo di kada oportunidat pa motivá i eduká komunidat den su totalidat pa loke ta trata limpiesa di Kòrsou. Nos a logra hopi, pero ainda Kòrsou no ta limpi manera mester ta. Nos ta konsiente ku esaki ta rekerí un kambio di mentalidat di nos pueblo. Nos tin ku sigui enfoká riba kon importante ta pa biba riba un isla liber di shushedat i un medioambiente sano.

E logro di 20 aña sirbiendo komunidat no ta di e kompania so, sino ta di nos tur. Ta p’esei huntu ku abo nos ta selebr’é. Nos ta sigui konta ku un i tur su aporte i sosten. Nos ta sigui traha riba un maneho konsistente i un struktura optimal pa yega na É Kòrsou limpi ku nos tur ke mira.

Abo i Selikor...huntu nos ta ten’é e isla’ki limpi.