KOMUNIKADO DI PRENSA
No. 2015/006


 Selikor NV
Fecha: 14 di yüli 2015
Tópiko: Selikor i Ministerio di salubridat públiko, medio ambiente i naturalesa ta yega na un akuerdo ku transportadó di shushi
Telefon: 434-1349/Faks: 465-6964
wèpsait: www.selikor.com


Selikor i Ministerio di salubridat públiko,
medio ambiente i naturalesa ta yega na un akuerdo ku transportadó di shushi

Despues ku dia 17 di yüni último transportadónan di shushi a okupá entrada di Lèntflel Malpais pa ekspresá nan malkontentu pa ku e hecho ku Selikor ta kobranan pa deshasí di shushi ku no ta di nan, Selikor huntu ku Ministerio di Salubridat Públiko, Medio ambiente i Naturalesa (GMN) ta yega na un akuerdo ku e transportadónan. E akuerdo en kuestion ta unu ku ta faboresé tur partido en kuestion.

E akuerdo ta enserá ku Selikor lo fasilitá transportadónan di shushi ku un formulario ku nan por usa na momentu ku nan ta bai transportá shushi pa un kliente. Ku e formulario aki doño di e shushi ta deklará ku e ta para responsabel pa e gastunan mará na deshasí di su shushi na Lèntfel òf Transbordo di shushi na Koraal Specht.

E prinsipio ku e doño di shushi tin di paga pa su shushi no ta algu nobo. Kada persona ku ta produsí shushi mester paga pa deshasí di esaki. Simplemente awor Selikor ta fasilitá pa tur transportadó di shushi, por medio di e formulario pa depositá shushi, ku e doño di shushi mester yena i firma ora ku e transportadó di shushi ta bai ku su shushi.

E formulario mester ta kompleto i korekto yená i mester bai akompañá ku kopia di identifikashon di e doño di shushi, pa e por wòrdu aseptá serka e personal di Selikor.

Entrante 14 di yüli tur persona òf instansha ku ta hasi uso di un transportadó di shushi lo por risibí e formulario enkuestion serka nan transportadó ku e petishon pa kompletá i firma esaki. A base di e formulario aki Selikor lo faktura e doño di e shushi e gastunan di prosesamentu di shushi na Lèntfel.

Entretantu e lei di Landsverordering Openbare Orde (L.O.O) a keda tratá den Parlamentu. Outoridatnan konserní ta pendiente pa publikashon di e lei aki di forma ku por aktua ku man duru kontra tur esnan ku ta hasi nan mes responsabel pa deshasí di shushi na sitionan ku no ta destiná pa esaki. Komo doño di shushi bo ta keda responsabel pa bo shushi. Si no kumpli ku e lei di L.O.O. doño di shushi ta keda pèrsigui pa hustisia.

Un apelashon ta bai pues na komunidat kompleto pa hinka transporte di bo shushi den man di transportadónan responsabel ku lo bai depositá shushi na e úniko sitionan legal pa hasi esaki ku ta na Lèntfel Malpais òf Transbordo di shushi na Koraal Specht. Despues ku e transportadó kaba di depositá bo shushi pidié pa e komprobante di esaki. Di forma aki nos tur por aportá na un Kòrsou limpi.

Riba e potrèt athunto por mira representantenan di transportadónan di shushi den reunion ku sr. John Cijntje, Operations Manager di Selikor NV