KOMUNIKADO DI PRENSA
No. 2017/023

 


 

Selikor NV
Fecha: 13 di desèmber 2017
Tópiko:
Brasami ta trese esfera di Pasku usando materialnan di resiklahe
Telefon: 434-1349/Faks: 465-6964

wèpsait: www.selikor.com


 

Brasami ta trese esfera di Pasku usando materialnan di resiklahe

 

Siman pasá djaweps Selikor tabata di bishita na Brasami. E kustumber pa dekorá den esfera di Pasku ta bibu den nos kultura. E personal i klientenan ku ta hospedá den Brasami tambe a skohe pa dekorá henter e kompleho. Loke a hasi e dekorashon úniko ta ku nan a bini ku e idea pa por hasi uzo di materialnan ku por reusá i resiklá komo dekorashon di Pasku.

 

Esaki a bira un proyekto den forma di un kompetensia entre e departamentunan i kantornan. Di e forma akí a lanta hopi entusiasmo i kreatividat mei mei di e famia di trahadó i klientenan di Brasami. Selikor a forma parti di e kuerpo di hurado i a saka e departamentu òf kantor ku mas kreatividat pa loke ta trata e dekorashon sin kumpra nada nobo pa dekorá kuné. E kuerpo di hurado por a atmirá e dekorashonnan ku sigur a hasi un impakto.

Pa Selikor, kada un partisipante ta un ganadó sin eksepshon di niun. Loke a impreshoná nos mas ta e trabou den tim ku ta e motibu prinsipal di e temporada di fin di aña, manteniendo pas i alegria. Selikor a hasi un gesto di 2500,00 florin na Brasami pa nan por sigui stimulá mas tipo di proyektonan asin’aki ku ta konsientisá riba uso di material i riba e importansia di limpiesa.

Ta interesante ku mas i mas instansianan i kompania tambe por tuma tipo di inisiativanan akí no solamente pa e aspekto di kompetensia sino tambe pa e union ku bo ta krea bou di koleganan. Brasami, bon trabou. Sigui asina!