KOMUNIKADO DI PRENSA
No. 2017/024
Selikor NV
Fecha: 29 di desèmber 2017
Tópiko: Selikor ku apelashon na komunidat pa hasi limpi despues di sende pagara
Telefon: 434-1349/Faks: 465-6964
wèpsait: www.selikor.com
Selikor ku apelashon na komunidat pa hasi limpi despues di sende pagara
Nos a yega e rekta final di aña 2017 i komo tradishon diferente kas, kompania i otro establesimentunan ta sera aña ku un show di pagara. Ta di e forma úniko akí nos komunidat ta despedí di e aña koriente i yama bon biní na e aña nobo. Selikor kier hasi un apelashon na tur persona òf instansia, ku tambe ta duna kontenido na e tradishon di sende pagara, pa hasi esaki di un forma responsabel.
Sendementu di pagara no mester forma un peliger ni pa esun ku ta sende esaki ni pa esnan den besindario. E mester sosodé di un forma seif i sigur. Sende pagara den un forma responsabel tambe ta enserá sòru pa limpiesa di e asera, kaya, tereno òf espasio despues ku e pagara tira. Bari e restu di e pagara ku keda atras di moda ku esaki no ta forma un molèster pa otronan.
Pa empresanan ku ta tene shownan di pagara grandi riba vianan públiko òf riba nan tereno di parker outo Selikor ta ofresé e servisio di bari ku mashin. Pa mas informashon por tuma kontakto ku nos representantenan na 434-1300.
Laga nos tur ku ke sigui ku e tradishon di pagara tuma e prekoushonnan nesesario pa hasi esaki responsabelmente. Laga nos ban habri aña 2018 ku un bista limpi i bunita rondó di nos kas. Selikor ta deseá henter komunidat un aña nobo limpi yená ku dicha i bendishon. Sa ku den 2018 tambe nos lo tei pa sigui sirbibo i sigui mehorá nos servisio. Felis aña nobo ta deseo di gerensia i personal.
