KOMUNIKADO DI PRENSA
No. 2018/002
Selikor NV
Fecha: 19 di yanüari 2018
Tópiko: Selikor ku slogan “T’asina ta hende” komo mensahe pa karnaval 2018
Telefon: 434-1349/Faks: 465-6964
wèpsait: www.selikor.com
Selikor ku slogan “T’asina ta hende” komo mensahe pa karnaval 2018
Pa nos temporada di karnaval 2018, Selikor ta trese e slogan: T’asina ta hende, ku e meta pa sigui motivá i eduká nos komunidat riba importansia di limpiesa. Ku e slogan akí, Selikor ke yama atenshon di tur karnavalista riba un bon komportashon durante i despues di karnaval. E mensahe: t’asina ta hende, su énfasis ta riba un bon komportashon den tur sentido. Tantu e forma kon nos ta para na kantu i apresiá nos gruponan di karnaval, nos aktitut positivo i prinsipalmente e forma kon nos ta atendé ku nos shushi.
T’asina ta hende, ta E HENDE ku bon intenshon. E hende ku sa di komportá su mes responsabel, e ta aktua korekto i ku rèspèt pa otro. E hende ku ta atendé ku shushi di un forma responsabel.
Karnaval ta e temporada di aña den kua hende ta ekspresá su mes den un forma hopi kreativo i original. Ta e temporada tambe ku nos ta trata na lubidá tur nos problemanan i pone goso na promé lugá. Ta Karnaval ta loke por pone grupo di personanan demostrá ku trahamentu huntu ta un kondishon importante pa nos por selebrá. Asina tambe nos mester ta konsiente ku si nos no tene nos kayanan limpi nos no por disfrutá di un dushi karnaval.
T’asina ta hende, E hende konsiente ku mester sali kas ku su saku di shushi i hasi bon uso di dje i asina mantené nos kayanan limpi i bunita. Nos kada un por ta ehèmpel pa otro dor di tira shushi den saku di shushi, paso t’asina ta hende!
Felis karnaval 2018!
