Ta doño di e shushi ta esun ku ta keda responsabel pa su shushi, te hasta ora e hinka e transporte den man di un transportadó privá. Den pasado na numeroso okashon a presentá situashonnan kaminda ta topa shushi bentá na áreanan ku no ta destiná pa esaki. Den algun di e kasonan akí por a averiguá ken ta doño di e shushi i hopi bes esaki ta indiká ku ta paga el a paga un hende pa bai ku su shushi. Pa e motibu akí ta importante pa e doño di shushi informá ku eksaktitut ta na unda e transportadó ta bai basha su shushi i tambe pa verifiká despues si esaki a sosodé di forma korekto. Pa verifiká esaki e mester eksigí di e transportadó un komprobante di basha shushi. Di e forma akí ta evitá ku su shushi ta resultá na sitionan ilegal di deshasí shushi.
Na Kòrsou ta únikamente dos sitio tin kaminda legalmente por deshasí di shushi. Nos ta papia akí di lèntfel Malpais òf transbordo Koraal Specht. Tur otro sitio ta ilegal i tantu e transportadó komo doño di e shushi ta kore rísiko di risibí un multa si e transportadó basha shushi di forma ilegal. Selikor ta atvertí komunidat pa no kore ningun rísiko inesesario i atendé ku bo shushi di forma legal, responsabel i ku atenshon pa nos medioambiente. Selikor ta ofresé diferente servisio ku por yuda den esaki.
Ainda a sobra luna di novèmber di e aña akí ku Selikor lo pasa den tur bario pa rekohé shushi gròf grátis. Komunidat por hasi bon uso di e servisio gratuito akí. No laga pa dezèmber. Awor ta ora pa hasi bo limpiesa di fin di aña.
