Tur aña di nobo Selikor ta duna su aporte na e organisashon ku risibí e enkargo pa organisá Kòrsou su karnaval. E aña akí no ta eksepshon i Selikor ya a bin ta duna su aporte na Fundashon JAG. Meskos ku tur aña ta e kaso, despues di e marchanan di Karnaval, Selikor ta sòru pa e limpiesa. Mester bisa ku ta un trabou ku ta rekerí hopi forsa laboral. Limpiesa despues di marcha di karnaval ta eksigí un organisashon total, sigur si tene na kuenta e orarionan ku e trabounan mester tuma lugá i ku e trabounan diario di Selikor tambe mester sigui normal.

Pa fasilitá e trabounan i sòru pa nan kana optimal, Selikor ta hasi e petishon na públiko karnavalesko pa sali kas ku un òf mas saku di shushi. Na final di marcha pone tur saku di shushi yen parti dilanti di e drangheknan di forma ku personal di Selikor por bai ku esaki. Esaki ta konta tambe pa personanan ku ta para wak Karnaval na un stelashi. Mantené e área rondó di bo stelashi semper limpi i na final di kada marcha fasilitá Selikor su trabou dor di rekohé tur loke keda banda di e stelashi, hinka den un saku. Evitá di usa bòter di glas ya ku esaki por forma un peliger pa bo mes i tambe ta difikultá e trabounan di limpiesa.

Mas aleu Selikor ta pidi públiko tambe pa duna e personal espasio pa hasi e limpiesa di nos kayanan despues di marcha. Den koperashon ku outoridatnan lo sera e kayanan parsialmente pa tráfiko pa e trabounan por tuma lugá.

Si nos tur duna di nos banda nos lo por tin un periodo di Karnaval eksitoso. Sali kas ku bo saku i benta bo shushi den dje, pasó t’asina te hende. Selikor ta deseá nos muchanan prinsipal un dushi marcha hubenil.