KOMUNIKADO DI PRENSA
No. 2015/001
Selikor NV
Fecha: 19 di Yanüari 2015
Tópiko: Biblionef huntu ku Fundashon Limpi Bunita i Selikor ta stimulá bon uso di papiamentu atraves di e proyekto “Lesa papiamentu...ekspresá bo talento”
Telefon: 434-1349/Faks: 465-6964
wèpsait: www.selikor.com
Biblionef huntu ku Fundashon Limpi Bunita i Selikor ta stimulá bon uso di papiamentu
atraves di e proyekto “Lesa papiamentu...ekspresá bo talento”
Djaluna 19 di yanüari 2015, Ouditorio di Selikor tabata esenario pa presentashon di dos proyekto interesante spesial diseñá pa alumnonan di skolnan di Fundeshi. Ta trata aki di un proyekto di Biblionef ku a introdusí karchi di lesa na papiamentu. Ku introdukshon di karchinan di lesa na papiamentu, skolnan di Fundeshi ta disponé di mas material pa lesa den nos idioma i alabes ta stimulá e bon uso di papiamentu. E promé serie di 25 karchi di lesa na papiamentu ta un proyekto piloto ku Biblionef a introdusí ku koperashon di Selikor NV. Ta e intenshon pa Biblionef produsí mas karchi di lesa na papiamentu ku diferente tópiko edukativo pa nos muchanan.
E di dos proyekto ku a keda presentá pa Selikor ta den forma di un kompetensha di ekspreshon artístiko ku yama: ‘Lesa papiamentu...ekspresá bo talento’.
Durante e mèrdia ei Selikor, FKLB i Biblionef a indiká riba e importansha di lesa papiamentu, ku énfasis pa konsientisá nos muchanan riba e aspekto di limpiesa di nos pais. Loke finalmente nos ke logra ta sigui stimulá e uso korekto di papiamentu, for di edat di mucha. Nos ta kere ku di e forma aki nos lo fomentá mas sentido di patriotismo i amor tantu pa nos idioma komo pa nos pais. Nos ta konvensí ku esun ku ta stima nos pais lo tene esaki limpi. Di e forma aki Selikor i FKLB ta sigui duna kontenido na e plataforma di kompetensia sano entre skolnan.
E proyekto di Selikor i FKLB ‘Lesa papiamentu...ekspresá bo talento’ ta unu ku ta drai rondó di e karchinan di lesa i diseñá spesialmente ku e tópiko di limpiesa i medioambiente na Papiamentu. Ora bo usa e karchinan di lesa aki komo base, e alumnonan lo por partisipá na e kompetensha di ekspreshon artístiko. Den e kompetensia aki e partisipantenan lo demostrá nan abilidat i talento den diferente arte manera drama, músika, poesia, kanto i baile.
E kompetensia ta partí den diferente kategoria di nivel di lesa. Mundu di enseñansa ta usa e terminologia AVI (= “Analyse van indivualiseringsvormen”). Na papiamentu e ta AFI, ku ta para pa Análisis di Formanan di individualisashon. Tin 5 kategoria di partisipashon kuminsando for di AFI 1 te ku AFI 5. Naturalmente tin premionan interesante pa e skolnan ganadó i alabes tin premio di estímulo pa kada alumno ku partisipá.
E dianan ku kada kompetensia lo tuma lugá ta konosí kaba. E skolnan tur ku a presentá, a risibí nan pakete di informashon huntu ku e formulario pa inskripshon.
Biblionef, FKLB i Selikor ta sigui kere den nos futuro generashon i ta sigui duna hopi atenshon sigur pa loke ta trata e aspekto di formashon. E proyekto di ‘Lesa papiamentu...ekspresá bo talento’ ta unu mas pa sigui konsientisá nos komunidat.
Pa mas informashon tokante e proyekto aki por manda un mail na lesapapiamentu@selikor.com.
