KOMUNIKADO DI PRENSA
No. 2017/004
Selikor NV
Fecha: 15 di mart 2017
Tópiko: Selikor a rekohé 87 mil kilo di shushi durante karnaval 2017
Telefon: 434-1349/Faks: 465-6964
wèpsait: www.selikor.com
Selikor a rekohé 87 mil kilo di shushi durante karnaval 2017
Kompará ku 2016 e kantidat a baha ku aproksimadamente 10 mil kilo di shushi ku a rekohé durante tur e marchanan di karnaval.
Pa Karnaval 2017 kontando tur e marchanan Selikor a rekohé alrededor di 87 mil kilo di shushi, kompará e kantidat akí ku aña pasá esaki a wòrdu redusí ku aproksimadamente 10 mil kilo.
Den e temporada di Karnaval, hopi tabata esnan ku si a perkurá pa atendé di un manera responsabel ku nan shushi, pero tambe tabata tin un otro grupo ku no a hasi esei i a preferá na sea benta nan shushinan abou òf laga restunan di nan stelazje tirá kantu di e ruta di karnaval.
Karnaval ta wòrdu yamá e fiesta di ‘pueblo’ pero no ta henter komunidat ta partisipá aktivo. Konsekuentemente esnan ku si a partisipá i a gosa di dje, tin e deber síviko di perkurá, no solamente pa nos kayanan keda limpi pa nos mes i e turistanan ku ta bishitá nos pais, pero tambe pa esnan ku no tabata tin di haber ku e selebrashon kultural akí.
Kòrsou ta un lugá turístiko, un isla ku ta wòrdu bendé den eksterior komo un paraiso. Pa e motibu akí, komo suidadano, nos mester kuid’é pa ora ku estranheronan bini nos pais nan por regresá di nan vakashon ku un bon impreshon.
Mantené Kòrsou limpi no ta solamente trabou di Selikor, sino di henter e komunidat. Nos huntu tin ku traha manera e konosido tumba ta bisa: “man den man” pa nos por sigui mantené i pèrkurá pa mantené loke ta di nos limpi. Selikor ta i lo sigui hasi su esfuerso pa hasi nos isla limpi i lo keda konta ku sosten di pueblo di Kòrsou pa mantené esaki limpi.
