KOMUNIKADO DI PRENSA
No. 2017/012
Selikor NV
Fecha: 6 di sèptèmber 2017
Tópiko: representante di China Zhenrong Limited ta bishitá Selikor
Telefon: 434-1349/Faks: 465-6964
wèpsait: www.selikor.com
Representante di China Zhenrong Limited ta bishitá Selikor
pa eventual trabounan den futuro riba maneho di shushi
Djamars, 5 di sèptèmber, Selikor a risibí bishita di un representante di China Zhenrong Limited sr. Chao Lu huntu ku sra. Natalie Petronella den representashon di Ministerio di desaroyo di Ekonomia. E bishita akí tabatin e meta pa interkambiá pensamentu pa un eventual relashon di trabou den un futuro serkano.
E kompania di Guandong Zhenrong Energy ta un potensial operador di Refineria Isla. Den e kaso akí Selikor lo por ofresé e servisio di maneho di shushi den su totalidat i resiklahe riba e tereno di e refineria aki na Kòrsou.
Ta e intenshon pa Selikor yega na un akuerdo mutuo di forma ku por inisiá inventarisá e tipo i tambe e kantidat di shushi ku ta keda produsí riba tereno di e refineria. A base di e resultadonan akí por amplia riba e forma kon Selikor lo por ofresé su servisionan.
Riba e foto sr. Chao Lu, sra. Natalie Petronella huntu ku gerensha i representantenan di Selikor NV.
