KOMUNIKADO DI PRENSA
No. 2010/001
Selikor NV
Fecha: 11 febrüari 2010
Tópiko: kampaña di konsientisashon ‘Papia i protehá bo mes’
Telefon: 434-1349/Faks: 465-6964
web-site: www.selikor.com
PERSONAL DI SELIKOR TA MOTIVÁ PA ‘TALK RED’
Selikor a adoptá e kampaña ‘di GGD ku ta para pa ‘Papia i protehá bo mes’! E kampaña ta dirigí pa informá komunidat riba e importansha ku pa bo por protehá bo mes bo mester papia tokante di e tópiko di HIV/Aids. E meta ta pa na final di e kampaña aki nos tur ta mas konsiente kiko ta e konsekuensianan di entre otro e vírus di HIV i e malesa di Aids.
Durante henter e luna di febrüari lo bai tin riba tur djabièrnè, sekshonnan informativo interaktivo dirigí pa algun profeshonal den e sektor di seksualidat i di medisina. Durante e sekshonnan, e personal di Selikor, lo bai papia i elaborá mas tantu riba seksualidat i kiko ta e konsekuensianan ora no hasi esaki sigur.
Públiko lo bai ripara ku riba tur djabièrnè personal di Selikor lo tin un t-shirt kòrá ku e lema ku ta bisa ‘Nos ta hasié sigur’! Nifikashon di e lema ‘Nos ta hasié sigur’ ku ta aparesé riba e t-shirt tin dos nifikashon.
Na promé lugá ‘Nos ta hasié sigur’ ta nifiká ku nos komo trahadó di Selikor ta hasi nos trabou sigur. Pues ku e aspekto di siguridat ta importante pa nos. Banda di esaki ‘Nos ta hasié sigur’ tambe ta indiká ku nos komo persona ta tene relashon di un forma responsabel i sigur pa prevení HIV/Aids.
Meskos ta konta pa e fin di siman di karnaval, e tim di trahadó ku ta hasi trabounan di limpiesa despues di e marchanan, lo bisti nan t-shirt kòrá.
Ku esaki Selikor ke ilustrá e responsabilidat ku e ta karga komo kompania i komo parti di e komunidat di Korsou, pa henter e personal ta bon informá. Despues di e proyekto nos por ta mas konsiente di e hecho ku e malesa di HIV ta sigur algu ku nos tur por evitá.
