KOMUNIKADO DI PRENSA
No. 2024/021
Selikor NV
Fecha: 31 di òktòber 2024
Tópiko: Kambio den ruta pa rekohé shushi di kas
Telefon: 434-1349/Faks: 465-6964
wèpsait: www.selikor.com
Kambio den ruta pa rekohé shushi di kas
Den un komunikado resien, Selikor a informá ku lo bai traha ku un skema adaptá pa rekohé shushi di kas. Di e forma akí truknan di shushi por pasa den tur bario na Kòrsou, poniendo énfasis riba e rutanan di kua no a alkansá yega siman pasá.
Pa awe djaweps, lo konkluí ku sobra barionan ku no a rekohé djamars. E barionan di djarason lo ta na turno entre awe, djaweps, i djabièrnè. Pa e fin di siman Selikor lo sigui trahá riba djasabra i djadumingu pa finalisá e rutanan di djaweps i djabièrnè.
E personal di Selikor ta hasiendo su máksimo esfuerso di manera ku tur bario por risibí servisio e siman akí. Gerensia ta pidi su diskulpa pa eventual inkonbeniensia ku e retrasonan akí por trese kuné i ta pidi su klientenan indulgensia i komprenshon. Nos ta hasiendo tur posibel ehersisio pa evitá retraso riba nos servisio di rekohé shushi di kas di un forma struktural.
KOMUNIKADO DI PRENSA
No. 2024/020
Selikor NV
Fecha: 29 di òktòber 2024
Tópiko: Adaptashon den skema di rekohé shushi di kas
Telefon: 434-1349/Faks: 465-6964
wèpsait: www.selikor.com
Adaptashon den skema di rekohé shushi di kas
Den un komunikado di siman pasá, Selikor a informá ku debí na sirkunstanshanan fuera di nos alkanse, ta eksperensiando algun retraso den e skema di rekohé shushi di kas. Siman pasá no a logra konkluí ku tur ruta di kas i ta intenshon pa e siman akí por minimalisá e retraso mas tantu posibel pa tur ruta di kas keda rekohé.
Mientrastantu, awe mainta a sali pa bai rekohé e ruta di djamars, ku énfasis riba e barionan ku siman pasá a keda atras. Segun nos personal di garashi ta trahando pa solushoná e problema tékniko ku nos trùknan i e siman ta transkurí, lo adaptá e skema di rekohé shushi di kas den tur nos barionan na Kòrsou. Si ta nesesario, e personal lo traha fin di siman riba djasabra i djadumingu pa finalisá e skema atrasá.
Selikor ta keda komprometé pa kumpli ku nos responsabilidat riba nos maneho di shushi. Nos ta pidi, un biaha mas, nos diskulpa pa eventual molèster ku e retraso akí por a okashoná.
KOMUNIKADO DI PRENSA
No. 2024/019
Selikor NV
Fecha: 25 di òktòber 2024
Tópiko: Selikor NV lo trata pa minimalisá retraso den rekohementu di shushi di kas
Telefon: 434-1349/Faks: 465-6964
wèpsait: www.selikor.com
Selikor NV lo trata pa minimalisá retraso den rekohementu di shushi di kas
Selikor NV ta partisipá, ku debí na sirkunstanshanan fuera di nos alkanse, ta eksperensiando algun retraso den e skema di rekohé shushi di kas. Konsekuensia di esaki ta ku tin algun bario ku no a haña servisio riba e dia kustumbrá.
Pa loke ta trata e rutanan di djabièrnè, Selikor lo rekohé e shushinan djabièrnè mes i pa konkluí ku esakinan riba djasabra. Personal di Selikor lo hasi su máksimo esfuerso, pa durante fin di siman trata na finalisá e skema atrasá.
Nos ta konsiente ku e situashon aktual ta inkómodo pa kada habitante ku sigur ta eksperensiá ekseso di shushi dilanti di nan kas. Selikor ta pidi diskulpa na habitantenan di e barionan ku mester a rekohé shushi i ku no a alkansá yega e siman akí.
okashoná.
