KOMUNIKADO DI PRENSA
No. 2010/002
Selikor NV
Fecha: 5 mart 2010
Tópiko: FKLB, Selikor i OM ta bai guera kontra di shushi
Telefon: 434-1349/Faks: 465-6964
web-site: www.selikor.com
FKLB, SELIKOR I OM TA BAI GUERA KONTRA DI SHUSHI
Nos tur ta di akuèrdo ku otro ku, no opstante tur esfuersonan di konsientisashon i limpiesa di tantu Fundashon Korsou Limpi Bunita (FKLB) i di Selikor NV, Kòrsou no ta birando mas limpi. Teniendo na kuenta ku pronto nos lo bai drenta nos pais nobo ta di mas bisa ku nos ke drenta tambe un pais limpi. Pa trese un buèlta den e situashon di limpiesa ku nos isla ta aden Selikor NV a djòin FKLB den e MOVESHON BÈRDÈ.
E Moveshon Bèrdè lo bai enkaminá tres trayekto ku lo bai kore paralelo ku otro. Nan ta na promé lugá e trayekto di konsientisashon, na di dos lugá e trayekto di limpiesa i na di tres lugá e trayekto di sanshon.
Pa duna kontenido na e tres trayektonan aki FKLB, Selikor NV i Ministerio Públiko huntu ku entre otro SKS, Kuerpo Polisial i Servisio Ambiental a djòin pa ataka di un forma integral e problemátika di shushedat riba nos isla.
Durante un enkuentro ku prensa, djabièrnè 5 di mart, den ouditorio di Selikor NV, e diferente partidonan a bini huntu pa presentá kon kada unu lo bai e guera kontra di shushi. E esfuersonan konhunto di e partidonan ariba menshoná lo mester fungi tambe komo un magnet pa otro organisashonnan i komunidat kompletu djòin e guera kontra di shushi. Kada suidadano riba su mes mester kuminsá eksihí di nan kosuidadanonan pa nan tene nos isla limpi i laga tende nan bos na momentu ku nan mira un persona ta shusha nos isla. E Moveshon Bèrdè mester drenta den i rondó di nos kas, den nos barionan, den nos skolnan, den nos empresanan. Kada persona individual mester sirbi komo bosero di e Moveshon Bèrdè aki. Esaki ta e meta prinsipal di e moveshon aki.
Durante di aña komunidat lo bai ripará diferente aktividat den kuadro di e Moveshon Bèrdè i tantu FKLB komo Selikor ta spera ku mas empresa djòin e lucha aki. Pa mas informashon por tuma kontakto ku Cesar Rodriguez na 434-1307.
Despues di e konferensha di prensa Selikor a duna tambe un demonstrashon di un ekipo nobo ku nan a kaba di atkerí. Ta trata aki di un mashin di bari di kapasidat haltu ku lo bai usa tantu komersialmente komo pa limpiesa di áreanan públiko. Riba e foto por mira e mashin nobo aki.
