KOMUNIKADO DI PRENSA
No. 2010/003
Selikor NV
Fecha: 30 mart 2010
Tópiko: SELIKOR A START KU LIMPIESA DI SITIONAN KAMINDA TA DESHASI SHUSHI ILEGAL
Telefon: 434-1349/Faks: 465-6964
web-site: www.selikor.com
Selikor a start ku limpiesa di sitionan kaminda ta deshasí shushi ilegal
Selikor den kuadro di su maneho di shushi tin entre otro komo tarea hasi limpiesa na sitionan kaminda ta deshasí di shushi ilegal. Lamentablemente e kompania ta konstatá ku esaki ta sosodé ku un frekuensia demasiado haltu ya ku e áreanan aki ta bolbe bira shushi djis despues ku Selikor kaba di hasi limpi. Hopi di e áreanan aki ta áreanan ku ta keda alehá for di bista di hende pero ku alabes por representá un naturalesa masha bunita sigur pa nos industria di turismo. Shushando e áreanan aki nan ta pèrdè nan balor ekológiko i ta duna un mal imágen di loke nos isla ke para p’e.
Resientemente Selikor a start ku su limpiesa anual den diferente bario riba nos isla. Aki a bin konstatá un bes mas un kantidat enorme di diferente tipo di shushi.
Entre e shushinan aki a bin topa entre otro bestia morto, shushi gròf i shushi di konstrukshon. Remarkabel ta ku na algun di e sitionan aki a bin topa tambe foyetonan di diferente organisashon komersial ku ta ópera riba nos isla.
Selikor a tuma kontakto kaba ku e kompanianan konserní ku e petishon pa nan investigá kon e shushinan aki a bin resultá na e sitionan no destiná pa depositá shushi. Selikor ta hasi un apelashon na tur suidadano i tambe kompanianan pa sigurá nan mes ku nan shushi ta bai keda depositá na lèntfel Malpais òf transbordo Koral Specht. Nan por hasi esaki dor di eksigí di e persona òf empresa ku ta transportá nan shushi un komprobante di registrashon ku nan ta risibí na momentu ku nan depositá e shushi na un di e dos sitionan legalmente destiná pa esaki.
Alabes nos ke rekordá ku tiramentu di shushi, na sitionan ku no ta destiná pa esaki, ta un akto ilegal. Personanan ku hasi nan mes kulpabel na e akto aki lo keda pèrsigui pa hustisia.
Riba e foto nan aki bou por haña un bista di sitionan kaminda ta deshasí shushi ilegal kua ta sitio ku den 2009 a keda limpia i pa e promé kuartal di 2010 mester bolbe limpia
