KOMUNIKADO DI PRENSA
No. 2010/004
Selikor NV
Fecha: 26 aprel 2010
Tópiko: KONSTRUKSHON DI KAYA DI MEDIO AMBIENTE
Telefon: 434-1349/Faks: 465-6964
web-site: www.selikor.com
SELIKOR TA INISIA TRABOUNAN PA KONSTRUI UN KAYA DI MEDIO AMBIENTE
Djaluna, 26 di aprel 2010, Selikor NV den presensia di medionan di komunikashon i un grupo di invitado a desvelá un bòrchi pa simbólikamente duna inisio na e trabounan di konstrukshon
Komo un kompania inovativo i alabes lider den e merkado lokal Selikor NV semper ta kana dilanti riba desaroyonan den maneho di shushi. Sigur pa por mantené su sertifikashon di medioambiente ISO 14000 Selikor ta traha kontinuamente na mehorá e implementashon di un maneho di shushi integral. E maneho di shushi integral aki ta rekerí ku mas tantu posibel mester resiklá tur shushi ku nos isla ta produsí.
Kaya di Medioambiente
Pa duna kontenido na e maneho di resiklahe Selikor ta konstruyendo un kaya di medioambiente (“milieustraat”) na e kompleho di Malpais. Den e kaya 
di medioambiente aki públiko por pasa estilo “drive through” ku nan pekùp òf trùk pa depositá e diferente kategoria di shushi di forma separá den kònteinernan ku ta destiná pa esaki. Pa kada kategoria di shushi manera, shushi di konstrukshon, tayer, metal, plèstik, glas i tambe shushi ku no por resiklá lo tin un kònteiner speshal ku públiko por hasi uso di dje. Na final di e kaya di medioambiente aki tambe lo por entregá e grupo di shushinan manera stof, frishidèr, wasmashin (“wit goed”), tambe bateria i tiponan di shushi manera televishon, kòmpiuter i otro aparato eléktriko (“bruin goed”).
Mashin pa separá shushi
Pa por prosesá tur e shushinan ku keda entregá den e kaya di medioambiente pa e fin di resiklahe Selikor a instalá un mashin speshal pa separá shushi (“sorteermachine”). Funshon prinsipal di e mashin aki ta pa sòru pa e shushi ta mas limpi posibel, loke ta nifiká sòru pa saka tur loke no ta materialnan deseá for di e shushi. Pues den e lote di glas no por tin aluminio i den e lote di aluminio no por tin plèstik, etc. Tambe e mashin di separá aki ta sirbi pa hasi distinshon den e diferente tiponan di e mesun kategoria di shushi, p.e. glas di diferente kolo.
Resiklahe di shushi den materia prima
Despues di sali for di e mashin pa separá e shushi lo pasa den un proseso pa redusí e volúmen, p.e. glas lo wòrdu di krùsh i karton lo wòrdu di pèrs. Seguidamente lo empaketá e shushi i prepará e diferente lotenan di shushi pa por eksportá esakinan na kompanianan ku ta resiklá e shushi den materia prima.
E mashin pa separá shushi ta operashonal for di sèptèmber 2009. Segun planifikashon, e trabounan di konstrukshon pa e kaya di medioambiente, lo dura mas o ménos 3 luna. Bisando esei, lo no dura muchu pa e area aki tambe ta operashonal pa brinda servisio na nos komunidat. Ku e proyekto aki Selikor ke yuda kambia e forma ku nos ta mira i atendé ku shushi. No ta tur shushi ta shushi i dor di separá shushi esaki ta haña un balor ekonómiko. Separashon di shushi tambe ta kontribuí na redusí e gastunan pa deshasí di shushi i ta alargá bida di nos lèntfel.
Pa e motibu aki Selikor ke motivá i enkurashá un i tur pa for di awor kuminsá separá nan shushi mas tantu posibel, sigur shushinan manera empakenan di bebida di glas, aluminio i plèstik ya ku pronto lo bai lansa diferente kampaña pa públiko bin trese e tipo di shushinan aki na e kaya di medioambiente na Malpais.
