KOMUNIKADO DI PRENSA
No. 2010/006
Selikor NV
Fecha: 13 di ougùstùs 2010
Tópiko: KURSO KORE SIGUR
Telefon: 434-1349/Faks: 465-6964
web-site: www.selikor.com
SELIKOR KU KURSO “KORE RESPONSABEL I SIGUR” PA SU PERSONAL
E kapital di mas importante di Selikor NV ta e kapital humano i komo parti di un maneho di personal proaktivo Selikor NV tur aña di nobo ta traha un plan di formashon pa su personal. E plan di formashon aki ta konsistí di diferente treinen i kurso riba diferente nivel i ta dirigí pa engrandesé konosementu i abilidatnan di trahadónan i di e forma aki halsa nan produktividat.
Durante e siman aki personal di Selikor, ku ta partisipá den tráfiko pa nan trabou, ta siguiendo e kurso “Kore responsabel i sigur”.
Meta di e kurso aki ta pa sigui konsientisá personal di Selikor riba importansia di un aktitut responsabel den tráfiko. Un aktitut responsabel tin komo resultado lógiko ménos aksidente i un tráfiko mas sigur.
Manera ta konosí gran parti di e flota di Selikor ta konsistí di ekiponan pisá ku tur dia di nobo nos por mira ta trafiká riba nos kareteranan. Ta netamente den e punto aki tambe entre otro ta sintá e importansia di e kurso en kuestion. Manehá un ekipo pisá no ta meskos ku manehá un outo di famia i ta pa e motibu aki den e kurso tambe lo trata algun aspekto práktiko ku e personal mester paga tinu riba dje na momentu ku ta manehá un ekipo pisá. Tambe lo repasá e proseduranan na momentu ku un personal di Selikor hañ’é envolví den un aksidente di tráfiko. Konsientisashon i motivashon di e personal ta hunga un papel importante den e kurso aki ya ku e konosementu atkirí e personal ku ta partisipá den tráfiko lo por tin e aktitut korekto i e komportashon deseá den tráfiko. E kurso ta na enkargo di sra. Tweeboom i sr. leito di Selikor NV. Na ta keda asistí pa dos kompania eksterno, Crossroad Upgrading Safety Traffic representá pa sr. Samson i Gosucon NV representá pa sra. Gomes.
Selikor ta hasi un apelashon na tur otro organisashon, sigur esnan ku tambe mester partisipá den tráfiko pa ehekutá nan trabou, pa sigui e ehèmpel aki i di e forma aki yuda kontribuí na un tráfiko mas seif.
