KOMUNIKADO DI PRENSA
No. 2010/007
Selikor NV
Fecha: 22 di òktober 2010
Tópiko: Konstrukshon Kaya di Medioambiente a finalisá
Telefon: 434-1349/Faks: 465-6964
wèpsait: www.selikor.com
Konstrukshon Kaya di Medioambiente a finalisá
Djabièrnè, 22 di òktober 2010, den presensia di medionan di komunikashon i un grupo di invitado, a tuma lugá entrega ofisial di e Kaya di Medioambiente (“milieustraat”) na gerensia di Selikor NV despues ku trabounan di konstrukshon a tèrminá.
Manera ta konosí finansiamentu di e proyekto aki a tuma lugá ku fondonan di Hulanda manehá pa USONA den kuadro di e Inisiativa Sosial Ekonómiko (SEI). E Kaya di Medioambiente lo fungi komo un sentro kaminda públiko por entregá diferente tipo di shushi den forma surtí. Gran parti di e shushinan aki lo haña e destinashon di resiklahe.
Konstrukshon di e Kaya di Medioambiente ta forma parti di e maneho di shushi integral ku Selikor a bin ta hiba i mester duna kontenido na e aspekto di resiklahe komo un di e métodonan efektivo pa alargá bida di nos lèntfel. E Kaya di Medioambiente ta estilo drive through kaminda públiko por pasa ku nan vehíkulo i para na kònteinernan destiná pa diferente tipo di shushi. Kada kònteiner lo tin un bòrchi ku ta indiká kua tipo di shushi mester bai aden. Ta papia pa su mes ku pa hasi esaki e kliente mester surti su shushi adelantá. E Kaya di Medioambiente lo habri pa públiko dia promé di novèmber i lo tin e orario di 7or di mainta pa 5or di atardi.
Durante di e enkuentro ku prensa tambe a firma un deklarashon di intenshon pa benta di e promé kargamentu di material pa resiklá ku e kompania Antillean Scrap kende lo manda esaki den eksterior pa prosesá i traha materia prima di dje. Di e forma aki nos ta bai duna un balor na tur shushi ku nos kolektá separá i nos ta kontribuí na e desaroyo ekonómiko di nos pais aportando na e reserva di divisa.
Por último tambe a planta algun mata di dadel dilanti di e Kaya di Medioambiente. Esaki den kuadro di e siman di medioambiente ku Gobièrnu di Kòrsou a dekretá i ku ta kore di 18 pa 22 di òktober. Di e forma aki Selikor ta sigui kontribuí na un Kòrsou mas bèrdè.
Selikor ke motivá i enkurashá un i tur pa kuminsá separá nan shushi mas tantu posibel, sigur shushinan manera empakenan di bebida di glas, aluminio i plèstik ya ku pronto lo bai lansa diferente kampaña ku insentivá pa públiko bin trese e tipo di shushinan aki na e Kaya di medioambiente na Malpais. Den e dianan ku ta sigui lo bai repartí un foyeto di informashon kas pa kas pa henter komunidat por tuma nota di e desaroyo aki i kontribuí na e meta.
Konstrukshon Kaya di Medioambiente a finalisá
