KOMUNIKADO DI PRENSA
No. 2010/011
Selikor NV
Fecha: 22 novèmber 2010
Tópiko: Mantenshon di sertifikado di ISO
Telefon: 434-1349/Faks: 465-6964
wèpsait: www.selikor.com
Selikor un biaha mas sertifiká pa kalidat i medioambiente
Dia 15 i 16 di novèmber último Selikor a pasa, ku éksito, dor di e anual kòntròl eksterno pa e sertifikashon ISO 9001 i ISO 14001. Representantenan di BSI Management Systems BV di Hulanda a ouditá e diferente prosesonan interno den e kompania i a konkluí ku Selikor a sigui move den e bon direkshon pa loke ta regardá e kalidat di servisio i atenshon pa medioambiente.
Na desèmber di aña 2001 Selikor a risibí pa promé biaha e sertifikado di ISO 9001, ku ta e sertifikado di kalidat. For di aña 2001 e kompania a sigui traha duru pa kumpli ku tur e metanan di kalidat stipulá i di e forma aki a logra mantené e sertifikado di kalidat. Banda di esaki, na aña 2005, Selikor a haña un di dos sertifikado di ISO. Ta trata aki di e sertifikado di medioambiente, ISO 14001. E sertifikado aki tambe Selikor a logra mantené te ku awor.
Pa por logra mantené ámbos sertifikado na final di kada aña, ta hopi trabou ta tuma lugá durante di henter aña. Un di e prinsipal trabounan ta ku, antisipando riba e ouditoria eksterno, Selikor mes ta hasi su propio ouditoria ku ta unu interno. E ouditorianan interno ta un sorto di eksamen òf tèst outokrítiko ku e kompania ta tene 3 bes pa aña den su diferente departamentonan i den kua e mes ta kontrolá su mes. E diferente hefenan di departamentu ta tene un kòntròl den un departamentu ku no ta di nan i ta check si tur kos ta kana manera a planiá esaki i tambe ta duna sugerensia pa mehorashon kaminda ripará ku kosnan por kana mihó.
Meta di e ouditoria ta pues pa analisá si den práktika nos ta traha segun e palabrashonnan ku tin stipulá den e buki di sistema di ISO. E kòntròlnan interno aki ta redundá den un kantidat di puntonan kritiko di mehorashon i algun sugerenshanan pa adelanto den e diferente proseso i proseduranan empresarial.
Un bes pa aña ta tene tambe un asina yama evaluashon di gerensia komo preparashon pa e ouditoria eksterno di Hulanda. Esaki ta un reunion na kua tur hefe di departamentu i tambe e tim di maneho di Selikor ta bini huntu i ta presentá i diskutí riba e resultadonan di e diferente ouditorian interno ku ta tuma lugá. Ta evaluá si e kompania ta riba e bon kaminda pa bolbe risibí e sertifikadonan di ISO na final di aña.
Pa e aña aki a hasi e ouditoria eksterno na Selikor e funshonarionan Piet Coevert i Hans Snoeren di BSI kendenan a mustra di ta hopi satisfecho ku loke nan a topa durante di e ouditoria. Sr. Coevert a trese dilanti ku nan por konstatá adelantonan konkreto den e organisashon. E adelantonan aki tin di haber entre otro ku mas konsientisashon pa ku e sistema di ISO, un sistema di Performance Management ku por keda katalogá komo unu “Best of Class”, un programa di treinen pa personal bon deliniá, un kantidat i kalidat haltu di e ouditorianan interno i hopi atenshon pa kobransa di debedornan. BSI a finalisá bisando ku Selikor ta riba hopi bon kaminda pa loke ta trata mehorashon kontinuo tantu riba e aspekto di kalidat komo riba e aspekto di medioambiente.
Ku e logro aki Selikor ta sigui progresá riba e kaminda pa realisá su vishon, ku ta pa bira: ‘E kompania di maneho di limpiesa den region’.
Konstrukshon Kaya di Medioambiente a finalisá
