KOMUNIKADO DI PRENSA
No. 2011/004
Selikor NV
Fecha: 25 di febrüari 2011
Tópiko: SELIKOR TA KLOUSURÁ KAMPAÑA PENSA KÒRÁ KU EKSPRESHON DI ARTE DI HOBENNAN
Telefon: 434-1349/Faks: 465-6964
wèpsait: www.selikor.com
SELIKOR TA KLOUSURÁ KAMPAÑA PENSA KÒRÁ KU EKSPRESHON DI ARTE DI HOBENNAN
Djabièrnè, 25 di febrüari 2011, a tuma lugá den ouditorio di Selikor klousura di e kampaña Pensa Kòrá di Geneeskundige en Gezondheidzaken. E klousura aki a bai kompañá ku algun presentashon talentoso di hóbennan di Huize St. Jozef, Kinderoorden Brakkeput i tambe yunan di trahadónan di Selikor NV.
Manera ta konosí Selikor a adoptá e aña aki un bes mas den e luna di febrüari e kampaña di ‘Papia i protehá bo mes’. E kampaña tabata dirigí pa informá trahadónan di Selikor i komunidat en general riba importansha ku, pa por protehá bo mes, bo mester papia tokante di e tópiko di HIV/Aids. Tópiko di e aña aki ta ‘Pensa Kòrá’. Pues banda di papia riba e tópiko di HIV/Aids e aña aki Selikor a pone énfasis tambe riba e aspekto di pensa pa protehá nos mes i hiba un bida seksual ‘safe’.
Durante di un luna largu Selikor a traha di forma aktivo ku un grupo di hóben di internat Huize St. Jozef i Kinderoord Brakkeput, den kompania di yunan di trahadónan di Selikor. Bou di guia di Gala Lewis, Guineta de Palm i zùster Kapel a duna e hóbennan aki informashon riba e tópiko en kuestion i a traha ku nan pa via di nan talento nan demostrá kiko nan a siña di e tópiko. Durante di e atardi di klousura e hóbennan aki a demonstrá nan talentonan den diferente ekspreshon di arte.
Na e atardi di klousura Selikor a hasi donashon tambe na tres instansha den kuadro di selebrashon di su 15 aña komo kompania anónimo di gobièrnu. Un donashon a bai na e dos internatnan ku tambe a partisipá den e programa di Pensa Kòrá ku ta Huize St. Jozef en Kinderoorden Brakkeput i tambe na eorganisashon ASNA di zuster Kapel.
Selikor ta hasi un apelashon na otro kompanianan tambe pa duna e bon ehèmpel i adoptá e kampaña di Pensa i Papia Kòrá i duna un aporte na prevenshon di HIV/Aids.
