KOMUNIKADO DI PRENSA
No. 2011/016
Selikor NV
Fecha: 4 ougùstùs 2011
Tópiko: 15 aña Plan di Fakansi Selikor
Telefon: 434-1349/Faks: 465-6964
wèpsait: www.selikor.com
15 aña Plan di Fakansi Selikor
Selikor ta duna kontenido na e filosofia ku trahadónan i nan famia ta pará sentral. E plan di fakansi di Selikor ta un aktividat ku ta ripití tur aña i ta konsistí di tres dia yená ku masha hopi aktividat ku e meta pa eduká i entretené yunan di e trahadónan den un forma sano.
Riba e promé dia e muchanan por a traha obra di man ku materialnan reusá pa despues nan a sigui dibertí na Adventure City. E di dos dia nan a hasi un rekorido ku boto den bahía di Santa Ana pa despues bai landa na Janthiel Beach ku diferente aktividat rekreativo. Pa klousurá e Plan di Fakansi riba e di tres dia, a transformá un área na Transbordo di shushi den un feria. Aki e gruponan por a kore baiskel i pony disfrutando di nos dushi naturalesa. Alabes nan a keda entretené ku diferente wega edukativo.
Selikor ta orguyoso ku kada aña di nobo miembronan di su personal mes ta organisá i kordiná e Plan di Fakansi aki. E lidernan ku ta duna guia na e muchanan ta prinsipalmente trahadónan di Selikor huntu ku algun hóben ku tambe ta yu di trahadónan. Esaki ta un muestra mas ku Selikor ta sigui kere den su personal i ta envolví e famia di e personal tambe pa forma parti di aktividatnan sosial. Ku su Plan di Fakansi Selikor ta sigui duna kontenido na e filosofia ku su trahadónan i nan famia ta pará sentral i ku nos muchanan ta forma e base pa un mihó Kòrsou.
-riba e potrèt nos por mira e muchanan disfrutando di e Plan di Fakansi-
