KOMUNIKADO DI PRENSA
No. 2011/014
Selikor NV
Fecha: 28 di yüli 2011
Tópiko: Selikor ta troka bo shushi pa Fun Miles
Telefon: 434-1349/Faks: 465-6964
wèpsait: www.selikor.com
Selikor ta troka bòter di glas, bòter di plèstik i bleki di aluminio pa Fun Miles
Djaweps 28 di yüli, durante un enkuentro ku prensa na Selikor su Kaya di Medioambiente na Malpais, e kompania a anunsiá su partnership ku Fun Miles i a duna inisio na e kampaña Turn Junk into Fun.
Manera ta konosí den luna di novèmber 2010 Selikor a hasi apertura ofisial di su Kaya di Medioambiente. E Kaya di Medioambiente ta fungi komo un sentro kaminda públiko por entregá diferente tipo di shushi den forma surtí. Gran parti di e shushinan aki lo haña e destinashon di resiklahe. Konstrukshon di e Kaya di Medioambiente ta forma parti di e maneho di shushi integral ku Selikor a bin ta hiba i ta duna kontenido na e aspekto di resiklahe komo un di e métodonan efektivo pa alargá bida di nos lèntfel. E Kaya di Medioambiente ta estilo drive through kaminda públiko por pasa ku nan vehíkulo i para na kònteinernan destiná pa diferente tipo di shushi. Kada kònteiner tin un bòrchi ku ta indiká kua tipo di shushi mester bai aden.
Pa stimulá e konsenshi di resiklahe bou di komunidat i alabes oumentá uso di e Kaya di Medioambiente Selikor a pensa riba un insentivo pa personanan ku hasi uso di e Kaya di Medioambiente tresiendo nan shushi ku por resiklá. Di un manera inovativo i úniko ta bai premia tur persona ku duna un kontribushon na redusí e kantidat di shushi ku lo resultá riba nos lèntfel. Meta di e insentivo aki tambe ta pa yuda redusí e kantidat di shushi visual riba nos isla. Pa e motibu aki lo bai konsentrá riba e siguiente tiponan di shushi: bòter di glas, bòter di plèstik i bleki di aluminio.
Pa duna kontenido na e parti di insentivo Selikor a djòin forsa ku Fun Miles i a bira un di e partnernan mas di e loyalty program aki. Esaki ta enserá ku tur persona ku hasi uso di e Kaya di Medioambiente, pa bin depositá nan bòter di glas, bòter di plèstik i bleki di aluminio, lo risibí miles. E kampaña aki ta pa mustra komunidat ku nan shushi tin balor.
Ku e kampaña aki Selikor ta spera di por sigui motivá komunidat pa atendé ku shushi di forma responsabel i reforsá e maneho di resiklahe ku lo mester redundá den un bida mas largu pa nos lèntfel. Den luna di ougùstùs i sèptèmber tur kliente di Kaya di Medioambiente ta bini adishonalmente na remarke pa partisipá na un rifa pa gana 10.000 èkstra miles na momentu ku nan bin trese nan empakenan di bebida di glas, plèstik i aluminio. Keda pendiente pa nos avisonan den korant.
