KOMUNIKADO DI PRENSA
No. 2011/013
Selikor NV
Fecha: 21 di yüli 2011
Tópiko: Selikor ta eliminá seru di shushi den bario di Dein
Telefon: 434-1349/Faks: 465-6964
wèpsait: www.selikor.com
Selikor ta eliminá seru di shushi den bario Dein
Despues ku den e promé siman di yüli Selikor a pone un kantidat di ekipo i hende disponibel pa eliminá un sitio ilegal di deshasí shushi den Oranjestraat, ayera mester a bai den bario di Dein kaminda funshonarionan di X-team a detektá un situashon di shushedat similar. Ketu bai algun habitante di nos pais ta hasi nan mes kulpabel na e akto di deshasí di nan shushi di un forma iresponsabel i ilegal.
Limpiesa di e seru di shushi den área di Dein a generá un kantidat di 17.200 kilo di shushi i mester a kore un total di 6 kareda di dòmtrùk. Por a nota tur tipo di shushi den e área aki manera entre otro shushi gròf (kolchon, fèn, stul i mesa), shushi di kas i shushi di kurá.
 |
|
|
Un bes mas Selikor ta rekordá komunidat ku pa shushi gròf Selikor ta ofresé un bes pa luna servisio grátis. Un bes pa siman Selikor ta pasa rekohé shushi di kas den tur bario i si e habitante ta deseá esaki e mes tambe por pasa na Transbordo Koral Specht òf na e kompleho na Malpais pa deshasí di su shushi di kas i shushi di kurá kompletamente grátis. Pa shushi di konstrukshon tambe Selikor ta brinda e posibilidat pa trese esaki grátis na Malpais. Na Kaya di Medioambiente na Malpais por pasa i deshasí grátis di diferente tipo di shushi ku por resiklá. Esaki ta nifiká ku no tin niun motibu pa benta shushi kaminda esaki no te pèrmití pa lei.
Selikor ta bolbe hasi un apelashon na komunidat pa yuda kontrolá den nan bario i na momentu ku tuma nota di bentamentu di shushi di forma ilegal mèldu esaki mesora na SKS na number di telefon 917. Pa habitantenan ku ta usa transportadónan di shushi privá pa transportá nan shushi un rekomendashon ta bai pa pidi e transportadó aki e komprobante di landfill pa sa sigur ku nan a depositá e shushi na e úniko sitio legal pa hasi esaki. Di e forma aki e habitante ta evitá di haña su mes konfrontá ku problema na momentu ku X-team tene kòntròl.
