KOMUNIKADO DI PRENSA
No. 2012/009
Selikor NV
Fecha: 25 di aprel 2012
Tópiko: Selikor ta kumpra dos trùk di shushi nobo
Telefon: 434-1349/Faks: 465-6964
wèpsait: www.selikor.com
Selikor ta kumpra dos trùk di shushi nobo
Den e siman ku ta tras di lomba Selikor a risibí dos trùk di shushi nobo pa fortifiká e flota di trùk i optimalisá e servisio di rekohé shushi di kas. Kada trùk di shushi tin un kapasidat pa karga 18 tòn di shushi loke ta 3 tòn mas tantu ku e trùknan ku Selikor ta usando aktualmente. Representantenan di e kompania ku ta traha e trùknan tabata di bishita na Kòrsou for di Italia pa duna demonstrashon i instruí e personal ku lo bai kore i drecha e trùknan aki. E trùknan ta di marka IVECO/COS.ECO. ku ta internashonalmente konosí komo fabrikante di trùk i otro ekiponan pisá di kalidat superior i sertifiká pa ISO.
Atkisishon di e trùknan nobo lo mester minimalisá retrasonan ku por surgi den e skema di rekohé shushi debí na fayonan den ekipo. Pa e aña aki lo mester bestèl un kantidat di 4 trùk di shushi mas pa yega na e kantidat ideal pa sigui garantisá servisio na komunidat. Selikor ta hasiendo su máksimo esfuerso pa e pedido di trùk aki por sosodé mas pronto ku ta posibel ya ku lo dura entre 6 pa 8 luna pa e trùknan yega Kòrsou i bira operashonal.
Un biaha mas Selikor ta gradesí komunidat den su totalidat pa nan pasenshi i komprenshon i ta sigui traha duru pa duna un servisio sin interupshon. Un danki tambe na e personal di Selikor kompletu ku ta laborá tur dia di nobo hasiendo nan máksimo esfuerso pa rekohé tur kònteiner un bes pa siman na tur kas riba nos isla.
