KOMUNIKADO DI PRENSA
No. 2012/001
Selikor NV
Fecha: 2 di yanüari 2012
Tópiko: SELIKOR TA INTENSIFIKÁ REGLANAN PA USARIONAN DI LÈNTFEL MALPAIS
Telefon: 434-1349/Faks: 465-6964
wèpsait: www.selikor.com
SELIKOR TA INTENSIFIKÁ REGLANAN PA USARIONAN DI LÈNTFEL MALPAIS
Den afan pa kuida usuarionan di lèntfel Malpais, nos trahadónan i nos medioambiente, Selikor ta informá ku ta apliká e reglanan di seguridat muchu mas rígido riba tereno di lèntfel Malpais.
Tur usuario di lèntfel Malpais mester identifiká nan mes ku un reibeweis bálido i entregá nan shushi segun e reglanan stipulá di manera ku Selikor por deshasí di esaki responsabelmente.
For di momentu ku e kliente presentá ku shushi pa depositá, lo registrá e tipo i kantidat di shushi na entrada di lèntfel Malpais. Despues di esaki e kliente mester kore di forma responsabel bai na e parti patras di lèntfel kaminda e mester depositá su shushi na e área indiká pa personal di Selikor. Entrada den e área aki ta riba riesgo propio di e kliente.
Despues di orarionan ofisial di lèntfel Malpais, personanan ku no ta outorisá, no por permanesé riba e tereno. No ta permití mucha bou di 14 aña pafó di outo den e área di lèntfel Malpais. Kada kliente mester sigui instrukshon, riba tereno di lèntfel, di un trahadó uniformá di Selikor i tambe di e personal di seguridat. Tur persona ku drenta tereno di lèntfel Malpais mester sali bèk na momentu ku kaba di depositá nan shushi. Tur vehíkulo mester registrá na salida di lèntfel Malpais.
Segun reglanan di maneho interno, Selikor por ninga un persona òf vehíkulo entrada pa lèntfel si falta ku reglanan stipulá. Ta prohibí persona no outorisá sali ku kualkier tipo di shushi for di tereno di lèntfel Malpais.
Ni personal di Selikor i ningun otro persona ta outorisá pa tuma sèn den kaso ku duna asistensia di un forma òf otro riba e tereno di lèntfel Malpais. Solamente na e punto di benta por kanselá un pago na Selikor.
Selikor ta pidi tur usuario di lèntfel Malpais pa tene bon kuenta ku e reglanan aki i ta pidi e koperashon nesesario pa seguridat di kada un persona ku ta hasi uso di servisionan riba e tereno di lèntfel Malpais.
Alabes Selikor ta deseá pueblo di Kòrsou un felis aña 2012. Ku positivismo lo reina den nos tur su kas i kurason. Ta importante pa nos por mira den e mesun direkshon pa kambionan i desaroyonan positivo pa ku nos pais. Sigur pa loke ta trata e aspekto di limpiesa pa nos por tin un medioambiente mas limpi.
