KOMUNIKADO DI PRENSA
No. 2012/005
Selikor NV
Fecha: 23 di febrüari 2012
Tópiko: Marchanan di Karnaval a produsí 83 mil kilo di shushi
Telefon: 434-1349/Faks: 465-6964
wèpsait: www.selikor.com
MARCHANAN DI KARNAVAL A PRODUSÍ 83 MIL KILO DI SHUSHI
Selikor ta satisfecho kon trabounan a kana
Selikor pa añanan largu ta duna su kontribushon pa engrandesé nos Karnaval. E aña aki un bes mas e kompania a hasi trabounan di limpiesa riba ruta promé i despues di e 5 marchanan di Karnaval. E trabounan di limpiesa desplegá por ser katalogá komo trabounan grandi ku ta eksigí bon preparashon i kordinashon.
Pa hasi e trabounan di limpiesa Selikor a uza diferente ekipo pisá manera trùk di shushi i mashin di bari, esaki kombiná ku e forsa di labor di trahadónan. A repartí e trabounan bou di 2 tim pa kada marcha i kada tim tabata konsistí di mas o ménos 12 persona, bou di guia di un kordinadó. E promé tim a start na komienso di e ruta i e di dos tim a start na altura di Scheidelaar. Mester apuntá ku Selikor ta start ku trabounan di limpiesa un ora despues ku e último grupo di Karnaval ranka sali. Esaki pa no konglomerá e tráfiko i pa duna e públiko kant’i kaminda tur espasio pa regresá kas, despues di e marcha, sin muchu molèster. Konsekuensia di esaki ta ku sigur pa e marcha di despedida di djamars, 21 di febrüari, trabounan a finalisá te su siguiente dia mainta.
Por konkluí ku trabounan aki a kana bon i sifranan ta indiká ku a generá un kantidat di mas ku 83 mil kilo di shushi. Repartishon di sakunan di shushi dor di un tim di Fundashon Kòrsou Limpi Bunita i Selikor tambe a duna resultado. E uzo di saku di shushi sigur a fasilitá e trabou di Selikor i tambe a minimalisá e kantidat di shushi visual riba kaya.
Banda di e servisio di limpiesa Selikor a ofresé tambe e servisio di tualèt portátil pa públiko. Na diferente sitio stratégiko a ubiká un tualèt ku públiko por a hasi uso di dje i despues di kada marcha a pasa limpia esakinan. A ofresé e servisio aki tambe na diferente gruponan di Karnaval i na personanan ku a traha nan stèlashi riba e ruta.
Tambe a duna koperashon na kuerpo polisial pa sera i habri kayanan riba ruta di Karnaval ku barikada oraño. Mester bisa ku Selikor mes tambe a risibí bon koperashon di kuerpo polisial pa dirigí tráfiko na momentu ku trabounan di limpiesa tabata tuma lugá.
Un danki speshal ta bai na tur e trahadónan di Selikor ku a hasi tur e trabounan ariba menshoná posibel. Boso aporte ta wòrdu balorá dor di e famia di Selikor i tambe dor di komunidat kompletu. Palabranan di gradesimentu ta bai tambe na kuerpo polisial kompleto pa e koperashon risibí. Por último un danki di kurason na e públiko Karnavalista ku a aportá na fasilitá Selikor su trabou.
Awor ku e temporada di Karnaval ta tras di lomba Selikor ta bai sigui konsentrá riba limpiesa di barionan i sitionan kaminda ta deshasí shushi ilegal.
