KOMUNIKADO DI PRENSA
No. 2012/006
Selikor NV
Fecha: 10 di aprel 2012
Tópiko: Selikor ta pidi atenshon pa retraso den rekohementu di shushi di kas
Telefon: 434-1349/Faks: 465-6964
wèpsait: www.selikor.com
Selikor ta pidi atenshon pa retraso den rekohementu di shushi di kas
Selikor ta partisipá ku e siman aki lo surgi algun retraso den e skema di rekohé shushi di kas. Esaki ta debí na desperfekto ku a surgi ku algun ekipo di trabou. Personal di Selikor ta hasiendo su máksimo esfuerso pa aliviá e situashon aki den un tèrmino di tempu hopi kòrtiko.
Tur bario ku mester a haña servisio djaluna, 9 di aprel, lo haña servisio awe djamars, 10 di aprel. Barionan ku normalmente ta haña servisio riba djamars e siman aki lo haña servisio riba djarason, 11 di aprel. Ta pidi tur e habitantenan di e barionan konserní pa tene kuenta ku esaki i laga nan kònteiner pafó di kurá pa ora e trùknan pasa por hasi nan kònteiner bashí.
E retraso di djaluna último por trese kuné ku sobra di siman tambe lo tin algun bario ku Selikor lo no alkansá yega pa duna servisio riba e dia kustumbrá. Un petishon ta bai na e habitantenan aki tambe pa tene nan kònteiner pafó di kurá.
Dor di skùif un tiki den e skema di rekohé shushi Selikor ta trata pa no laga ningun bario keda hopi dia ku nan shushi. Selikor ta pidi su diskulpa pa e eventual molèster ku e kambio den servisio aki por trese kuné i ta gradesí e barionan en kuestion pa nan koperashon.
