KOMUNIKADO DI PRENSA
No. 2011/019
Selikor NV
Fecha: 15 di dezèmber 2011
Tópiko: SELIKOR TA AMPLIÁ KAMPAÑA DI FUN MILES KU SHUSHI DI KURÁ
Telefon: 434-1349/Faks: 465-6964
wèpsait: www.selikor.com
SELIKOR TA AMPLIÁ KAMPAÑA DI FUN MILES KU SHUSHI DI KURÁ
Den kuadro di e promé selebrashon di e dia, dekretá pa Minister Jacintha Constancia, komo Dia di Trahadónan den Sektor di Limpiesa, Selikor ta bai rekompensá fun miles na tur bishitante di Landfill ku bai depositá shushi di kurá.
Manera ta konosí den luna di ougùstùs 2011 Selikor a djòin forsa ku Fun Miles i a bira un di e partnernan mas di e loyalty program aki. Tur persona ku hasi uso di e Kaya di Medioambiente, pa depositá bòter di glas, bòter di plèstik i bleki di aluminio, ta risibí Fun Miles. Ku e kampaña aki Selikor a mustra komunidat ku shushi tin balor.
Entrante djamars 20 di dezèmber 2011, pa selebrá Dia di Trahadónan den Sektor di Limpiesa, Selikor ta amplia su kampaña di Fun Miles ku shushi di kurá. Esaki ta enserá ku habitantenan ku limpia nan kurá di kas i bai depositá esaki na landfill ta bini na remarke pa risibí Fun Miles. E kondishon prinsipal pa bini na remarke ta ku e shushi di kurá (rama, taki, palu, etc.) mester ta prosedente di e habitante su kas te na un máksimo di un pekùp chikí. Pues kompanianan ku ta rekohé shushi di kurá na diferente kas no ta bini na remarke pa e insentivo aki. Otro kondishon ta ku e shushi di kurá no por ta bruá ku otro tipo di shushi.
Na momentu ku e habitante yega landfill Malpais e ta keda risibí for di entrada pa un trahadó di e Kaya di Medioambiente ku lo kontrolá su pekùp pa inform’é si e ta bini na remarke pa risibí Fun Miles. Despues di esaki e persona por sigui normal pa e balansa di pisa shushi kaminda lo registrá su shushi. Seguidamente e por bai parti patras riba landfill pa depositá e shushi. Na salida e persona lo haña su bon pa por risibí su Fun Miles nan na e kashèr na landfill.
Ku e kampaña aki Selikor ta spera di por sigui motivá komunidat pa atendé ku shushi di forma responsabel i evitá ku ta deshasí di shushi di kurá na sitionan ku no ta destiná pa esaki. E kampaña di Fun Miles ta keda na vigor pa e siguiente tiponan di shushi tambe: bòter di plèstik, bòter di glas, bleki di aluminio.
Pa medio di e komunikado aki tambe Selikor ta felisitá tur trahadó den e sektor di limpiesa ku nan dia. Un pabien en partikular ta bai na e personal di Selikor kompletu. Nos ta orguyoso di boso.
