KOMUNIKADO DI PRENSA
No. 2012/010
Selikor NV
Fecha: 21 di mei 2012
Tópiko: Selikor ta splika ku plaga di muskita no ta debí na ekipo
Telefon: 434-1349/Faks: 465-6964
wèpsait: www.selikor.com
Selikor ta splika ku plaga di muskita no ta debí na ekipo
Den diferente medio sosial a sali publiká den fin di siman aki ku tin un plaga di muskita ku ta afektá nos playanan i ku esaki ta konsekuensia di no tapa shushi na lèntfel Malpais.
Pa medio di e komunikado aki Selikor ta desmentí e informashon aki kategórikamente ya ku esaki ta inkorekto. Den maneho di lèntfel Malpais ta stipulá ku tur dia mester tapa e shushi ku trùknan di Selikor i otro usuarionan basha riba e tereno. Selikor ta kumpli di forma struktural ku esaki tambe.
Sa sosodé ku tin ekiponan ku mester hasi e trabou ku ta desperfekto òf den reparashon pero semper Selikor ta buska un solushon pa esaki dor di entre otro hür ekipo serka tersera. Esaki pues ta pa evitá ku mester desviá for di e maneho diario i pa por keda den liñanan di loke leinan lokal, leinan internashonal i e sertifikado di medioambiente ta stipulá.
Ta bèrdat tambe ku Kòrsou ta eksperensiando molèster di muskita, entre otro den serkania di nos playanan, pero esaki ta konta pa rònt Kòrsou i no solamente áreanan den besindario di lèntfel Malpais. Pues Selikor ta bolbe enfatisá ku trabounan na lèntfel Malpais no ta kousante di e plaga di muskita ku tin aktualmente.
Komo kompania responsabel Selikor ya a tuma tur medida nesesario pa sigui garantisá ku trabounan riba nos lèntfel por kontinuá i den esaki ta pone èkstra atenshon pa e problemátika di plaga di muskita ku ta molestiando nos rònt Kòrsou.
