KOMUNIKADO DI PRENSA
No. 2012/014

Selikor NV
Fecha: 12 di novèmber 2012
Tópiko: Trahadónan di Selikor nan Yerba ta mas Bèrdè
Telefon: 434-1349/Faks: 465-6964
wèpsait: www.selikor.com

Trahadónan di Selikor nan Yerba ta mas Bèrdè

Djaluna 12 di novèmber 2012, na su ofisina prinsipal na Parera, Selikor a duna inisio na un proyekto inovativo ku ta hiba komo título “Mi yerba ta mas bèrdè”. Despues di esaki miembronan di e tim di maneho, kompañá pa direktor general di Selikor, sr. Wesley Kook, a hasi un rekorido denus pasando asina tur filial di Selikor.

E proyekto “Mi yerba ta mas bèrdè” ta dirigí riba personal di Selikor i ta enserá ku trahadónan di Selikor durante 12 pa 16 di novèmber ta interkambiá funshon ku otro. Trahadónan di den kantor a ekspresá gana di subi trùk di shushi pa eksperensiá kon nan koleganan operashonal ta duna servisio na komunidat. Koleganan operashonal a inskribí pa konosé mas di aserka trabounan di den ofisina. Loke ta hasi e proyekto aki úniko ta e hecho ku e inisiativa a sali for di e personal di Selikor mes.

E kapital di mas importante di Selikor ta e kapital humano i komo parti di un maneho di personal proaktivo Selikor tur aña di nobo ta traha un plan di formashon pa su personal. Rekurso humano ta un pilá sumamente importante pa Selikor. Hendenan responsabel, íntegro ku ta forma un sinergia ku otro ta faktornan ku ta krea un esfera di enfrentá retonan.

 Den e kuadro aki mester mira e proyekto “Mi yerba ta mas bèrdè” ku tin komo meta stimulá espíritu di tim, komprenshon pa otro su trabou, komunikashon i krese konosementu di tur e diferente áreanan di trabou den Selikor.

Ku e proyekto aki Selikor ta marka pouta, pasombra ainda na Kòrsou no tin ningun kompania ku a konosé un proyekto similar. Nos ta sumamente kontentu ku un biaha mas e famia di Selikor por para komo un kompania modelo pa nos dushi pais Kòrsou. Komunidat di Kòrsou por sigui konta ku e kalidat di servisio haltu ku e famia di Selikor ta brinda. Nos ta sigui pa dilanti.

 

 

-riba e potrètnan nos por mira momentunan ku a duna inisio na e proyekto di interkambio