KOMUNIKADO DI PRENSA
No. 2013/002
Selikor NV
Fecha: 7 februari 2013
Tópiko: Selikor ta splika ku plaga di muskita no ta debí na ekipo dañá di e kompania
Telefon: 434-1349/Faks: 465-6964
wèpsait: www.selikor.com
Selikor ta pidi atenshon pa aspekto di limpiesa durante periodo di Karnaval
Karnaval ta e temporada di aña den kua nos ta ekspresá nos mes di un forma hopi kreativo i original. Karnaval ta pone grupo di personanan demostrá ku trahamentu huntu ta un kondishon importante pa logra e meta stipulá. Limpiesa ta un di e aspektonan ku lo determiná si Karnaval 2013 ta eksitoso òf no i tur bon Karnavalista mester duna su kontribushon na realisá un isla limpi promé, durante i despues di e fiesta magno aki.
Na tur aktividat di Karnaval, komo bon Karnavalista, nos mester sigui tene kuenta ku e aspekto di limpiesa. Selikor ta pidi un i tur pa ban traha ku e mesun euforia ku nos ta traha riba nos trahe i karosanan riba e aspekto di limpiesa tambe.
Sali kas bai wak Karnaval ku bo saku di shushi i hasi bon uso di dje. Na final di marcha pone esaki preferibelmente dilanti di e dranghek nan i Selikor lo sòru pa bai kuné. Esaki ta konta tambe pa personanan ku ta para wak Karnaval na un stelashi. Mantené e área rondó di bo stelashi semper limpi i na final di kada march fasilitá Selikor su trabou dor di rekohé tur loke keda banda di bo stelashi, hinka den un saku i pone esaki parti dilanti di e dranghek.
Evitá di usa bòter di glas ya ku esaki por forma un peliger pa bo mes i tambe ta difikultá trabounan di limpiesa despues di e marchanan. Pa loke ta trata bòter di plèstik i bleki di aluminio separá esakinan di e sobra di shushi ya ku nan ta bal sèn. Hiba esakinan na Selikor su Kaya di Medioambiente na lèntfel Malpais i risibí Fun Miles. Selikor ta pidi atenshon tambe pa kambionan den su servisio di rekohé en konekshon ku e fiesta di Karnaval. E kambionan aki a keda publiká den nos medionan di komunikashon.
Si nos tur duna di nos banda nos lo por tin un periodo di Karnaval eksitoso. Selikor ta deseá un i tur un dushi i limpi Karnaval 2013.
