KOMUNIKADO DI PRENSA
No. 2013/003
Selikor NV
Fecha: 20 februari 2013
Tópiko: Marchanan di Karnaval a produsí 79 mil kilo di shushi
Telefon: 434-1349/Faks: 465-6964
wèpsait: www.selikor.com
Marchanan di Karnaval a produsí 79 mil kilo di shushi
Selikor pa añanan largu ta duna su kontribushon pa engrandesé nos Karnaval. E aña aki un bes mas e kompania a hasi trabounan di limpiesa riba ruta promé i despues di e 5 marchanan di Karnaval. E trabounan di limpiesa desplegá por ser katalogá komo trabounan grandi ku ta eksigí bon preparashon i kordinashon.
Pa hasi e trabounan di limpiesa Selikor a uza diferente ekipo pisá manera trùk di shushi i mashin di bari, esaki kombiná ku e forsa di labor di trahadónan. A repartí e trabounan bou di 2 tim pa kada marcha i kada tim tabata konsistí di mas o ménos 12 persona, bou di guia di un kordinadó. E promé tim a start na komienso di e ruta i e di dos tim a start na altura di Scheidelaar.
Mester apuntá ku Selikor ta start ku trabounan di limpiesa un ora despues ku e último grupo di Karnaval ranka sali. Esaki pa no konglomerá e tráfiko i pa duna e públiko kant’i kaminda tur espasio pa regresá kas, despues di e marcha, sin muchu molèster. Por konkluí ku trabounan aki a kana bon i sifranan ta indiká ku a generá un kantidat di mas ku 79 mil kilo di shushi.
Banda di e servisio di limpiesa Selikor a ofresé tambe e servisio di tualèt portátil pa públiko. Na diferente sitio stratégiko a ubiká un tualèt ku públiko por a hasi uso di dje i despues di kada marcha a pasa limpia esakinan. A ofresé e servisio aki tambe na diferente gruponan di Karnaval i na personanan ku a traha nan stèlashi riba e ruta.
Selikor ke hasi un súplika na tur esnan ku te ku awe no a kita nan propiedatnan for di kaminda pa hasi esaki mas lihé ku ta posibel. Ora ta desarmá stèlashinan òf stèntnan no laga nada keda atras. Kòrda ku shushi riba kaminda ta mahos bista pa nos mes i tambe pa turistanan ku ta bishitá nos isla. Despues di a gosa bon di Karnaval ban demonstrá nos sentido síviko i karga nos responsabilidat pa ku limpiesa di nos isla.
Un danki speshal ta bai na tur e trahadónan di Selikor ku a hasi tur e trabounan ariba menshoná posibel. Boso aporte ta wòrdu balorá dor di e famia di Selikor i tambe dor di komunidat kompletu. Palabranan di gradesimentu ta bai tambe na kuerpo polisial kompleto pa e koperashon risibí. Por último un danki di kurason na e públiko Karnavalista ku a aportá na fasilitá Selikor su trabou.
Awor ku e temporada di Karnaval ta tras di lomba Selikor ta bai sigui konsentrá riba limpiesa di barionan. Selikor lo sigui duna su aporte pa nos isla ta limpi, ta huntu ku abo so nos por logra esaki.
