Selikor ta hasi limpi, komunidat mester mantené limpi

KOMUNIKADO DI PRENSA
No. 2013/004

Selikor NV
Fecha: 4 mart 2013
Tópiko: Selikor ta hasi limpi, komunidat mester mantené limpi
Telefon: 434-1349/Faks: 465-6964
wèpsait: www.selikor.com

Selikor ta hasi limpi, komunidat mester mantené limpi

Selikor pa medio di e komunikado aki ke reakshoná riba un artíkulo ku a sali publiká den un korant lokal. E artíkulo ta hiba komo titulo ‘Selikor ta kreando un landfill den pleno Otrobanda’. Selikor ke splika ku den kuadro di su maneho integral tin entre otro komo tarea hasi limpiesa na sitionan kaminda ta deshasí di shushi ilegal. Lamentablemente e kompania ta konstatá ku esaki ta sosodé ku un frekuensia demasiado haltu ya ku e áreanan aki ta bolbe bira shushi djis despues ku Selikor kaba di hasi limpi.

E área spesífiko aki, un kurá na Frederikstraat, ta unu ku frekuentemente e personal di Selikor ta hasi limpi. Mester bisa tambe ku e tereno kaminda ta depositá e shushinan ilegal, ta tereno privá. Remarkabel ta ku na e sitio aki ta shushinan prosedente di Horeca ta keda depositá. Entre e shushinan aki a bin topa diferente bòter di glas i plèstik, bleki di aluminio, baki di foam i sobrá di kuminda.

Ta un lástima di konstatá ku netamente e tipo di shushinan aki ta keda depositá ilegal ya ku por risibí funmiles pa nan, na Kaya di Medioambiente na Malpais. Un motibu mas pa kumpli ku lei i no depositá shushi kaminda esaki no ta pèrmití.

Selikor ta hasi un apelashon na tur suidadano i tambe komersiantenan pa sigurá nan mes ku nan shushi ta bai keda depositá na lèntfel Malpais òf transbordo Koral Specht. Nan por hasi esaki dor di eksigí di e persona òf empresa ku ta transportá nan shushi un komprobante di registrashon ku nan ta risibí na momentu ku nan depositá e shushi na un di e dos sitionan legalmente destiná pa esaki.

Alabes nos ke enfatisá ku tiramentu di shushi, na sitionan ku no ta destiná pa esaki, ta un akto ilegal. Personanan ku hasi nan mes kulpabel na e akto aki lo keda pèrsigui pa hustisia. Na momentu ku tuma nota di bentamentu di shushi di forma ilegal mèldu esaki mesora na SKS na number di telefon 917.

Selikor ta konta riba un i tur su koperashon pa entre otro e área di Frederikstraat por keda limpi.

*potrèt*	*situashon*	*Fecha ku a saka potrèt*
1862, 1863	situashon promé ku limpiesa riba tereno na Frederikstraat	28 febrüari 2013
1888	momentu ku personal di Selikor ta limpiando ku loader	28 febrüari 2013
1890, 1893	despues di e trabounan di limpiesa	1 mart 2013
1908	un par di dia despues ku a limpia tereno na Frederikstraat	4 mart 2013