KOMUNIKADO DI PRENSA
No. 2013/007
Selikor NV
Fecha: 12 di sèptèmber
Tópiko: FUNDASHON KÒRSOU LIMPI BUNITA REKORDANDO KU BO TAMBE PA POR FORMA PARTI DI LUNA DI LIMPIESA
Telefon: 434-1349/Faks: 465-6964
wèpsait: www.selikor.com
FUNDASHON KÒRSOU LIMPI BUNITA REKORDANDO KU BO TAMBE PA POR FORMA PARTI DI LUNA DI LIMPIESA
Luna di limpiesa ya ta den full swing i tin diferente kampaña, programa nan di konsientisashon i akshonnan di limpiesa tumando lugá.
Pa stimulá e konsenshi di resiklahe bou di komunidat Fundashon Kòrsou Limpi Bunita (FKLB) huntu ku Selikor a bin ku e kampaña “Resiklá i dòbel bo Fun”. E kampaña speshal pa e luna di limpiesa, lo ta solamente 4 dia riba djasabra i djadumingu: 21, 22, 28 i 29 di sèptèmber 2013. Esaki lo konsentrá riba e siguiente tiponan di shushi: bòter di glas, bòter di plèstik i bleki di aluminio. Kada persona ku trese e tipo di shushinan aki di un forma separá, lo risibí dòbel Fun Miles. Nos ta dòbel bo Fun ku un máksimo di 100 Fun Miles pa kada dia di e kampaña. Entrega di mas ku 100 artíkulo, bo ta risibí un tas di kompra duradero.
Un otro kampaña ku komunidat por partisipá aktivamente na dje ta esun di kòntèst di pòtrèt, “E bon yu di Kòrsou ta tene su isla Limpi”. Simplemente saka un potrèt demostrando kon abo ta kuida nos medio ambiente dor p.e. na momento ku bo ta usa bo tas di kompra duradero na supermarket, limpiando dilanti i rondó di bo kurá di kas, yuda hasi limpiesa na sitionan kaminda ta benta shushi ilegal etc. Pòst e pòtrèt aki riba Facebook page di Selikor i laga bo amigunan like e potrèt. E persona ku mas like e siman ei ta gana un premio atraktivo i na final di e luna di Sèptèmber lo saka e premio grandi kual lo ta un Ipad.
Naturalmente FKLB ta sigui duna su presentashon nan durante henter aña kon pa kuida nos medioambiente na e diferente skol i organisashon nan, i si tin mas instansha ku interesá pa risibí esaki por tuma kontakto libramente ku nos na number di telefon 434-1307. I pa esnan ku kier organisá un akshon di limpiesa nos kier rekordá un i tur pa tuma kontakto ku nos adelante pa asina nos por kordiná esaki na un forma korekto.
