KOMUNIKADO DI PRENSA
No. 2014/002
Selikor NV
Fecha: 17 di aprel 2014
Tópiko: Ban kuida nos áreanan di rekreá durante Semana Santa
Telefon: 434-1349/Faks: 465-6964
Mail: info@selikor.com
wèpsait: www.selikor.com
Ban kuida nos áreanan di rekreá durante Semana Santa
Nos ta yegando e kulminashon di Semana Santa. Lo bai ta un fin di siman ku mayoria di nos lo ta konsentrá den áreanan rekreativo. Hopi di nos ta bai kamper òf pasa dia na nos dushi playanan òf den naturalesa. E áreanan aki ta sitionan ku tambe nos mester kuida i mantené limpi. Realisá ku e área mester keda limpi despues di Semana Santa pa asina nos tur komo un bon yu di Kòrsou por sigui disfrutá di nan na tur okashon. Laga nos sali kas ku nos saku di shushi i hasi bon uso dje. No laga shushi keda atras, sigur no na e áreanan ku no ta habitá. Selikor a sòru pa sigur algun di nos playanan mas bishitá tin sufisiente kònteiner pa hinka shushi aden i lo pasa hasi esakinan bashí riba un base mas regular durante e fin di siman di fiesta binidero.
CTB a sòru pa èkstra tualèt portátil na diferente playa pa públiko. Un súplika ta bai pa nos hasi bon uso di tualètnan portátil i kòrda semper ku tin mas hende ta hasi uso di nan.
Ban komportá nos mes komo un bon yu di Kòrsou. Konsiderá ku limpiesa ta un di e aspektonan ku ta determiná ku nos por disfrutá i rekreá den un ambiente sano. Selikor lo sigui duna su aporte pa nos isla ta limpi, ta huntu ku abo so nos por logra esaki.
