KOMUNIKADO DI PRENSA
No. 2014/004
Selikor NV
Fecha: 30 di mei 2014
Tópiko: Selikor ta kordiná akshon di limpiesa den kuadro di Nation Building
Telefon: 434-1349/Faks: 465-6964
wèpsait: www.selikor.com
Selikor ta kordiná akshon di limpiesa den kuadro di Nation Building
Den kuadro di selebrashon di 30 aña di bandera Gobièrnu di Kòrsou a instalá un Task Force ku tin na enkargo e trayekto di Nation Building. E trayekto aki ta konsistí di diferente proyekto i aktividat dirigí na halsa e sentido di ‘un nashon’ den komunidat di Kòrsou. Un di e proyektonan aki, ku ta enfoká riba e aspekto di limpiesa den bario, ta na enkargo di Ministerio di Salubridat Públiko, Medio Ambiente i Naturalesa. Selikor NV den su kalidat komo e kompania di limpiesa di Kòrsou a risibí di e ministerio aki e enkargo pa implementá i kordiná e proyekto en kuestion.
Kontenido di e proyekto ta ku lo bai tene akshon di limpiesa na algun plenchi ku a keda indiká pa e Task Force i tambe algun otro área den diferente bario rònt Kòrsou. Interesante ta pa menshoná ku e trabou di limpiesa lo tuma lugá dor di hóbennan di bario mes ku aktualmente ta desempleá. Di e forma aki no solamente ta krea trabou pa e hóbennan aki pero tambe ta stimulá serka nan e sentido di amor pa nan bario. E meta final mester ta ku habitantenan di kada bario ta sinti nan mes yamá pa yuda limpia i mantené na bario limpi.
E trabounan di limpiesa ku ta inisiá den e promé siman di yüni 2014 den e diferente barionan indiká pa e Task Force i lo konkluí pa 2 di yüli kual ta e dia ku Kòrsou ta selebrá dia di himno i bandera. E pensamentu tras di esaki ta ku kada bario lo tin un plenchi/área limpi kaminda na por subi un bandera riba dia 2 di yüli dunando honor na nos bandera. E bario lo por organisá un aktividat sosial pa habitantenan di e bario di manera ku huntu i den harmonia nan por reflekshoná riba e sentido komun di ta un nashon.
Resientemente tabatin un enkuentro di informashon kaminda 24 representante di e organisashonnan di bario tabata tei presente. Durante e enkuentro aki kada organisashon di bario a keda informá kua ta e área ku nan ta enkargá kuné pa ku e trabounan di limpiesa. Aktualmente tantu Selikor komo e organisashonnan di bario ta preparando un ke otro pa start ku e limpiesa na e diferente den e promé siman di yüni 2014.
Banda di e trabounan di limpiesa, Selikor NV huntu ku Fundashon Kòrsou Limpi i Bunita (FKLB) den kombinashon ku e organisashonnan di bario lo bai organisá enkuentronan informativo den e diferente barionan. E intenshon ta pa nos habitantenan realisá e importansha i nesesidat pa nan mes yuda mantené nan bario limpi. Lo enfatisá esaki komo un responsabilidat síviko ku nos kada un tin ku nos pais. Netamente e parti aki tambe ta fet perfektamente den e trayekto di Nation Building ya ku komo nashon nos ta mustra amor pa nos pais aportando na su limpiesa. Durante e luna di yüni 2014 Selikor NV i FKLB lo bai mantené komunidat informá riba e proyekto di limpiesa aki dunando desaroyo di e trabounan den diferente bario.
Pa finalisá Selikor NV ta hasi un yamada na nos habitantenan di kada bario pa nos kada un ban duna nos kontribushon pa mantené nos barionan limpi i di e forma aki nos lo biba muchu mas agradabel i salú. Ta huntu nos ta logr’e.
