KOMUNIKADO DI PRENSA
No. 2014/008
Selikor NV
Fecha: 23 di sèptèmber 2014
Tópiko: Wes ta rechasá petishon di Kokomo riba Selikor pa daño i perhuisio
Telefon: 434-1349/Faks: 465-6964
wèpsait: www.selikor.com
Wes ta rechasá petishon di Kokomo riba Selikor pa daño i perhuisio
Awe mainta wes a duna sentensia riba e kaso ku Selikor a bai kontra di Kokomo den apelashon. E kaso aki ta trata e tópiko di “plaga di muskita” riba e huisio sumario ku Kokomo a entamá dia 22 di yanüari 2014 kontra di Selikor NV.
Wes a rechasá e petishon di Kokomo pa Selikor paga daño i perhuisio ku Kokomo a eksigí pa motibu di molèster di muskita. Alabes wes a kita e multa. Mirando e esfuerso i e maneho ku Selikor a bin ta hiba na Lèntfel, wes no ta haña ta nesesario pa mantené e multa aki.
Sinembargo wes ta konkluí ku Lèntfel, pa motibu di su aktividatnan, por okashoná muskita i no ta bai di akuerdo pa kibra e desishon ku ta Lèntfel a okashoná e molèster di muskita den área di Kokomo. No a keda prueba kiko ta e fuente di e molèster di muskita den e área konserní, pero tampoko ta ekskluí Lèntfel Malpais komo un di e kousantenan.
Gerensia di Selikor a reakshoná positivo ku e desishon di wes. Selikor a bin ta hiba un maneho ku ta kumpli ku normanan preskribí pa hiba un maneho di shushi na un manera responsabel i lo sigui hasi tur esfuerso pa kumpli ku esaki den su totalidat.
