KOMUNIKADO DI PRENSA
No. 2015/004

 Selikor NV
Fecha: 12 di mei 2015
Tópiko: Selikor ta klousura proyekto pa skolnan di fundeshi
Telefon: 434-1349/Faks: 465-6964
wèpsait: www.selikor.com

Selikor ta klousura proyekto pa skolnan di fundeshi

Djabièrnè 8 di mei último, sala di teater Luna Blou tabata yen pa presentashon di e skolnan ku a resultá den e finalistanan di e proyekto pa skolnan di fundeshi. E proyekto aki tabata den forma di un kompetensha di ekspreshon artístiko ku yama: ‘Lesa papiamentu...ekspresá bo talento’.

E proyekto di Selikor i FKLB ‘Lesa papiamentu...ekspresá bo talento’ tabata unu ku a drai rondó di 25 karchi di lesa na papiamentu diseñá spesialmente ku e tópiko di limpiesa i medioambiente na Papiamentu. E alumnonan di e 19 skolnan ku a partisipá mester a usa e karchinan di lesa na papiamentu komo base pa partisipá na e kompetensia di ekspreshon artístiko. Den e kompetensia aki e partisipantenan a demostrá nan abilidat i talento den diferente arte manera drama, músika, poesia, kanto i baile.

E kompetensia tabata partí den 5 kategoria di nivel di lesa, for di AFI 1 te ku AFI 5. Mundu di enseñansa ta usa e terminologia AVI (= “Analyse van indivualiseringsvormen”). Na papiamentu e ta AFI, ku ta pará pa Análisis  di Formanan di individualisashon. For di kada nivel di AFI tabatin 3 finalista di e skolnan ku mas a sobresalí den e AFI korespondiente. 

Di e 19 skolnan ku a partisipá, 13 skol a kai den premio. E sifra aki ta prueba ku e nivel di e presentashonnan di ekspreshon artístiko di kada skol tabata na nivel i kompetensia tabata fuerte. Kada presentashon riba su mes tabata bon prepará. E artefakto i artíkulonan ku e alumnonan a usa tabata loke ku nan mes a traha di material reusá.

E skolnan finalista pa kada nivel di AFI ta: AFI 1 - Prof. I.C. van Houte School, Dr. Nelly Winkel, Skol Básiko Cola Debrot. AFI 2 - Skol Alablanka, Kolegio Sür Herman Joseph, Skol M.C. Piar. AFI 3 - Elis Juliana-Sheila Karel, Kolegio Erasmo, Skol Chema Maduro/Angela Jessurun. AFI 4 - Sta. Rosa de Lima College, Kolegio Chaya Willems, St. Antonius College. AFI 5 - Skol Immanuel, Chema Maduro/Angela Jessurun Dr. Nelly Winkel Skol.

 Selikor i FKLB ta sigui kere den nos futuro generashon i ta sigui duna hopi atenshon sigur pa loke ta trata e aspekto di formashon. E proyekto di ‘Lesa papiamentu...ekspresá bo talento’ ta unu mas pa sigui konsientisá nos komunidat. Di e forma aki Selikor i FKLB ta duna muestra di nan envolvimentu ku komunidat di Kòrsou i partikularmente nos muchanan.

 Nota: Riba pòtrèt por mira algun di e presentashonnan