KOMUNIKADO DI PRENSA
No. 2016/012
Selikor NV
Fecha: 26 di óktober 2016
Tópiko:Selikor ta pasa ouditoria di ISO 9000 i ISO 14001 ku éksito
konekshon ku tormenta tropikal
Telefon: 434-1349/Faks: 465-6964
Mail: info@selikor.com
wèpsait: www.selikor.com
Selikor ta pasa ouditoria di ISO 9000 i ISO 14001 ku éksito
Manera pa e último 16 añanan tabata e kaso e aña akí tambe Selikor a pasa dor di e usual ouditoria di ISO. Durante 24 pa 26 di òktober, e kompania hulandes BSI, representá pa sr. Piet Coevert i sr. Barry Borst a ouditá Selikor NV riba e maneho di kalidat i di medioambiente ku e kompania ta hiba.
Selikor NV ya for di aña 2001 ta hiba su maneho segun normanan di ISO 9000 i for di aña 2005 segun normanan di ISO 14001 tambe. E proseso di ISO ta unu kaminda ta stipulá norma di prestashon, ta plania i ehekutá trabounan i ta midi prestashon. Tur esaki ku e fin di mantené un kalidat di servisio na nivel i kumpli ku normanan internashonal riba tereno di maneho di medioambiente. Durante aña ta tene momentunan di kontròl i korekshon interno i eksterno pa garantisá ku finalmente nos kompania ta kumpli mas tantu posibel ku e normanan stipulá. E sistema di ISO ta perkurá pa Selikor tin un instrumento ku ta garantisá ku tur nos aktividat i trabounan ta wòrdu realisá na un nivel di kalidat ku ta kumpli ku loke nos klientenan ta spera di nos i teniendo semper kuenta pa no hasi daño na nos medioambiente.
Un punto importante ku a bin dilanti durante di e ouditoria di BSI ta ku Selikor NV a bin ta traha di forma strukturá ku e meta pa mantené e kalidat di servisio haltu na nos klientenan. Asina tambe Selikor a konosé un adelanto den su prestashon. Esaki komo resultado di entre otro invershonnan ku e kompania a realisá den ekiponan nobo i tambe mantenshonnan ekstenso na ekiponan eksistente. Banda di esaki BSI a tuma nota tambe ku a mehorá e
kondishon di e departamentu di Garashi i di su personal. Tur esaki BSI ta konsiderá komo esfuersonan hasí den kuadro di mehorashon kontinuo, ku netamente ta e loke ISO ta para p’e.
Durante di e ouditoria BIS a rekonosé ku e forma ku Selikor ta registrá su prestashon ta bon hinká den otro. Naturalmente tambe a bin dilanti durante e ouditoria algun aspekto operashonal ku mester di mas atenshon. E último akí pa garantisá ku Selikor ta sigui den e rumbo di yega mas serka di e loke su klientenan ta spera di dje.
Ku e resultado di e ouditoria akí Selikor a prueba ku di forma konsistente nos a bin ta manehá segun normanan di ISO 9000 i ISO 14001. Konsekuentemente e kompania ta mantené ámbos sertifikado di ISO. Konklushon final di BSI riba e ouditoria di òktober 2016 ta ku Selikor a logra realisá un nivel aseptabel di kalidat di servisio i ku Selikor ta tene debidamente kuenta ku medioambiente den su maneho diario. BSI a apuntá ku Selikor a registrá un adelanto den su forma di operá.
Pa Selikor e sertifikashon di ISO no ta algu pará riba su mes. E sertifikashon ta forma parti di e maneho integral di e kompania. Selikor ta kontentu ku e logro akí i ta gradisí komunidat pa e sosten i konfiansa brinda na Selikor durante aña 2016.
