KOMUNIKADO DI PRENSA
No. 2017/001
Selikor NV
Fecha: 23 yanüari 2017
Tópiko: Selikor ta invertí den sentral di telefon nobo
Telefon: 434-1349/Faks: 465-6964
Mail: info@selikor.com
wèpsait: www.selikor.com
Selikor ta invertí den sentral di telefon nobo
Entrante 30 di yanüari 2017 próksimo Selikor NV lo disponé di un sentral di telefon nobo i kompania lo ta alkansabel via di 1 number general, ku ta 434-1300. Pa informashon, petishon, reklamo òf pa wòrdu komuniká ku un persona spesífiko por yama e number akí.
E invershon den un sentral nobo a bira nesesario debí ku e sistema aktual ta antikuá i no ta ofresé e posibilidat moderno ku un sentral di telefon mester kumpli kuné den e tempu di awor. Banda di esaki e sentral eksistente ta birando opsoleto ya ku e provedor no ta ofresé e modelo akí mas. Konsekuentemente Selikor por risibí e asistensia nesesario na momento ku surgi un problema.
Pa e kliente sigur e sentral nobo tin bentahanan grandi. Banda di e hecho ku awor Selikor ta alkansabel via di 1 solo number general, esta 434-1300, e kliente por laga su mensahe atras si e no ta deseá di warda. Si ta nesesario un representante lo tuma kontakto bèk ku klientenan ku laga un mensahe. Tambe e sentral por indiká na e kliente kiko ta e tempu di espera pa su yamada wòrdu atendé. Mas aleu e sentral nobo ta duna Selikor aun mas posibilidat pa monitoriá e kantidat di yamada ku drenta i e tempu ku ta tuma pa atendé kada yamada.
E number 46-LIMPI, ku te ku awor e kliente tabata yama pa entrega un keho, lo wòrdu deskonektá. E liña akí tabata un liña análogo i ku atkisishon di e sentral digital nobo lo eliminá esaki. Pa nos klientenan por kustumbrá ku e number akí sinembargo, temporalmente te ku fin di yanüari 2017, lo laga e liña akí habrí i klientenan lo wòrdu dirigí via di esaki na e sentral 434-1300.
Selikor ta sigui hasi invershonnan nesesario den ekipo i den sistema pa brinda klientenan un servisio na nivel. E invershon den un sentral nobo ta prueba di esaki.
