KOMUNIKADO DI PRENSA
No. 2017/007
Selikor NV
Fecha: 12 di aprel 2017
Tópiko: Selikor ta selebrá ku Krus Kòrá
Telefon: 434-1349/Faks: 465-6964
wèpsait: www.selikor.com
Selikor ta selebrá ku Krus Kòrá
E ambulans nobo di Krus Kòrá ta na Kòrsou i ta dunando asistensia den kasonan di primera ora.
Na aprel 2016 Selikor a lansa e proyekto di Stènki Busters Hunt ku e meta pa entre otro yuda Krus Kòrá yega na un ambulans nobo. Kumpliendo ku e responsabilidat síviko ku Selikor tin ku e komunidat nos por mira bèk riba un resultado positivo pa e hecho ku e proyekto di Stènki Buster Hunt a fungi komo un katalisadó pa Krus Kòrá por a atkerí un ambulans nobo.
‘Selikor a pone hopi hende aktivá’ esaki ta palabranan di Sr. Stomp di Krus Kòrá. Den e kaso spesífiko akí mester bisa ku no ta solamente e partisipantenan na e hunt a aktivá sino tambe otro organisashon i kompanianan a sa di aktivá i kontribuí finansieramente pa asina Krus Kòrá por a yega na e ambulans nobo. Esaki ta di aploudí! Un biaha mas ta keda probá ku union ta hasi forsa i ta solamente resultadonan positivo nos ta logra ora nos uní.
Selikor ta sumamente agradesido na tur esnan ku di un òf otro forma a saka un man pa yuda Krus Kòrá yega na un ambulans nobo i kristalisá un di nan soñonan. Komo kompania ku ta hiba maneho di limpiesa Selikor ta orguyoso di por sigui konsientisá komunidat pa tene nos isla limpi i den mesun rosea krea mas sentido di patriotismo i amor pa nos pais.
Manera nos a anunsiá anteriormente e trayekto di Stènki Busters Movement (SBM) ta aktivo. SBM ta un moveshon den kua komunidat kompleto lo ta envolví ku e meta pa keda mustra riba e responsabilidat ku komo suidadano kada un di nos mester karga pa hasi i mantené nos isla limpi. Spera mas di SBM den 2017...abo i Selikor huntu nos ta logr’é.
Riba potrèt: momentu ku Krus Kòrá a hasi un demostrashon di e ambulans nobo na Selikor
