KOMUNIKADO DI PRENSA
No. 2017/006
Selikor NV
Fecha: 5 di aprel 2017
Tópiko: Selikor ta amplia área pa mantenshon di su ekiponan
Telefon: 434-1349/Faks: 465-6964
wèpsait: www.selikor.com
Selikor ta amplia área pa mantenshon di su ekiponan
Djabièrnè, 31 di mart a tuma lugá na Garashi di Selikor na Parera apertura di e área nobo di trabou pa mantenshon di ekiponan. Ta trata aki di un área di alrededor di 800m2 ku anteriormente tabatin un otro destinashon. Servisio pa Obranan Públiko a pone e área akí na disposishon di Selikor di forma ku por a amplia e garashi aktual di e kompania. E lokalidat a wòrdu renobá i ekipá primordialmente pa trabounan di mantenshon preventivo na trùknan di shushi i otro vehíkulonan pisá den e flota di e kompania. E espasio nobo lo konosé 4 área di mantenshon kontinuo i 1 área kaminda lo bini un brùg pa hisa ekipo.
Durante un selebrashon interno chikí direktor di Selikor sr. Wesley Kook a hiba palabra i a trese dilanti ku, pendiente di konstrukshon di un garashi nobo, a hasi e ehersisionan nesesario pa duna mas atenshon na mantenshon preventivo di ekiponan i mehorá kondishonnan di trabou físiko di e personal di e departamentu en kuestion. Sr. Kook a gradesí representantenan di e sindikato ABVO, kendenan a intermediá pa e área bira disponibel pa por a hasi e ampliashon. Banda di esaki e tambe el a ekspresá palabranan di gradisimentu na representantenan di e sindikato BTG ku a yuda tene gerensia skèrpi riba asuntunan laboral. Un punto importante pa menshoná ta ku mayoria trabou ku a wòrdu ehersé den kuadro di e ampliashon akí a tuma lugá dor di trahadónan di Selikor mes i pa nan tambe sr. Kook tabatin palabranan di elogio.
Mantenshon kurativo lo sigui tuma lugá na e área bieu di garashi i e área akí tambe pronto lo haña un facelifting. Ya algun trabou den kuadro di esaki a inisiá na entre otro e kantornan i di e forma akí lo kontinuá pa e totalidat por funshoná di forma mas moderno, efisiente i efikas.
E ampliashon di Selikor su garashi lo mester hiba na redusí e kantidat di defektonan na su ekiponan i redusí e tempu di espera pa ekiponan defekto. Di e forma akí e kompania ke influenshá sifranan di disponibilidat di su ekiponan positivamente.
