KOMUNIKADO DI PRENSA
No. 2017/010
Selikor NV
Fecha: 25 di ougùstùs 2017
Tópiko: Hóbennan di Ser’i Papaya ta krea arte riba muraya
Telefon: 434-1349/Faks: 465-6964
wèpsait: www.selikor.com
HÓBENNAN DI SER’I PAPAYA TA KREA ARTE RIBA MURAYA
ku e meta realisá un Kòrsou mas limpi
E moveshon di Stènki Busters no ta spar niun rosea pa kontinuá ku proyektonan pa konsientisá komunidat i halsa e grado di limpiesa riba nos isla. E meta di e moveshon akí ta pa trese diferente proyekto pa komunidat ku e focus riba kambio di aktitut, riba e manera ku nos ta atendé ku shushi.
Durante e periodo di fakansi e bario di Seru Papaya tabata na turno. E biaha akí e artista Garrick Marchena a djòin ku Roberto Meeuw, un artista den arte di resiklahe, pa huntu regalá e hóbennan di Ser’i Papaya dos obra di arte riba muraya.
Riba inisiativa di Selikor, representante di Sentro di Bario Ser’i Papaya sra. Shanny Bitorina, Fundashon Kòrsou Limpi Bunita i e artistanan ariba menshoná a trese algun hóben di bario huntu pa krea nan propio arte.
Pintura di muraya
E pintura di muraya na Ser’i Papaya ta e di 4 den un seri di 8 muraya ku Selikor ta regalá komunidat. Meskos ku e 3 pinturanan anterior, Kurá di Shon Ki, Boca Sami i Rif, Garrick a inisiá e proyekto akí tambe ku tayernan kòrtiku. E tayernan ta enserá instrukshonnan básiko pa pinta i fèrf na e hóbennan ku a keda skohé, segun nan abilidat pa pinta. Un pintura di muraya ta tuma tempu pa finalisá ya komo ku tin diferente aspekto di téknika ku lo mester tene kuenta kuné. Tur ku ta interesá tambe por subi wak na e vèlt di futbòl na Ser’i Papaya pa mira kon e pintamentu ta desaroyá i bira un totalidat ku un mensahe bunita pa komunidat.
Arte di resiklahe riba muraya
Roberto Meeuw a bai un tiki mas leu ku solamente pinta un muraya. Den e kaso akí a krea un arte riba e muraya di e sentro di bario. Despues di un trayekto di preparashon a kolektá materialnan di resiklahe ku laman a trese na Boka Pistol den área di Vlakte di San Pedro. Ku esakinan a traha e arte riba e muraya. Tur hende ku subi Ser’i Papaya i bai den direkshon di e sentro di bario por apresiá un bunita obra di resiklahe ku ta kubrí henter un banda di e muraya di e sentro di bario.
E obranan di arte akí mester yama atenshon di un i tur, en espesial di esnan ku ta hasi nan mes responsabel di tira shushi kaminda no mester ta. Pa loke ta resta di aña 2017 Stènki Busters Movement lo sigui ta aktivo ku diferente proyekto ku finalmente mester kontribuí pa nos isla por ta riba un nivel di limpiesa ku nos tur por hala rosea den un medioambiente liber di shushedat. Tur e proyektonan akí tambe ta forma parti di e movementu ekstenso di Stènki Busters den kuadro di edukashon i formashon riba nos komportashon pa ku shushi.
Riba e foto algun ilustrashon di pintura na e vèlt di futbòl Ser’i Papaya, ku no ta kompletamente kla. E arte di resiklahe ta na e muraya di e Sentro di bario Ser’i Papaya.
