KOMUNIKADO DI PRENSA
No. 2017/014
Selikor NV
Fecha: 6 di òktober 2017
Tópiko: Selikor ta bishitá skolnan sekundario ku profeshonalnan den arte di resiklahe i músika.
Telefon: 434-1349/Faks: 465-6964
wèpsait: www.selikor.com
Selikor ta bishitá skolnan sekundario ku profeshonalnan den arte di resiklahe i músika.
Banda di hiba un maneho di limpiesa, Selikor huntu ku Fundashon Kòrsou Limpi Bunita tin diferente programa riba tereno di formashon pa konsientisá i eduká nos komunidat riba e aspekto di limpiesa. E programanan akí tin e meta pa konsientisá nos komunidat dirigí riba kambio di aktitut i amor pa nos isla. Selikor ta konosí pa su aktividatnan edukativo dirigí pa muchanan i hóbennan via di nan skol.
Resientemente Selikor a start ku algun bishita na skolnan sekundario huntu ku algun profeshonal den arte i músika. Ta trata akí di Gala Lewis, Omar Sling i Gedion Chandler. Ku e bishitanan na skol nos ke konsientisá nos hóbennan riba e importansia di kuido di nos medioambiente i un isla limpi. Tur esaki ta bai kombinashon ku un kompetensia musikal ‘Garbage is the New Music’. Tur skolnan ku a inskribí a risibí informashon amplio kon nan por traha instrumènt usando materialnan ku por reusá òf resiklá. Skolnan ta formando nan banda musikal ku ta konsistí di hóbennan talentoso bayendo e skolnan. Loke nos ke logra finalmente ta pa nos tin otro mira riba limpiesa i realisá kiko tur nos por hasi ku un material ora ku no tin uzo mas p’e. Enfoke ta riba arte i resiklahe.
No ta nos hóbennan so pero komunidat kompleto mester realisá ku si bo ta stima bo isla i ta orguyoso di dje, bo ta hasi tur loke ta na bo alkanse pa manten’é limpi. Selikor lo sigui konsientisá, motivá, eduká i forma komunidat riba e aspekto di limpiesa di nos pais. Nos ta kere ku sigur ku koperashon di komunidat nos lo logra un Kòrsou mas limpi i bunita.
Algun foto di bishitanan na skolnan sekundario
